- રાજ્યમાં શિયાળામાં વરસાદની આગાહી
- ઠંડીના માહોલ વચ્ચે વરસાદની આગાહી
- 25, 26 નવેમ્બરના વરસાદની આગાહી
રાજ્યના વિવિધ વિસ્તારોમાં ભર શિયાળામાં ચોંમસાનો માહોલ સર્જાવાની આગાહી સામે આવી છે. શિયાળામાં વરસાદી આગાહી સામે આવતા ખેડૂતોમાં ચિંતા વ્યાપી ગઈ છે. ગુલાબી ઠંડી વચ્ચે વિવિધ વિસ્તારમાં વરસાદના યોગ સામે આવ્યા છે. તારીખ 25 અને 26 નવેમ્બરના વરસાદની આગાહી કરવામાં આવી છે.
25 નવેમ્બરે આ જિલ્લામાં વરસાદ
ઉત્તર, દક્ષિણ, સૌરાષ્ટ્રમાં વરસાદની આગાહી કરાઈ છે. 25 નવેમ્બરની વાત કરવામાં આવે તો દાહોદ, પંચમહાલ, અમરેલી, દ્વારકા, ગીર સોમનાથ, જૂનાગઢ, પોરબંદર, રાજકોટમાં વરસાદની આગાહી કરાઈ છે.
26 નવેમ્બરે આ જિલ્લામાં વરસાદ
26 નવેમ્બરે આણંદ, અરવલ્લી, ખેડા, મહીસાગર, મહેસાણા, અમરેલી , ભાવનગર, ગીર સોમનાથ, રાજકોટ સહિત દક્ષિણ ગુજરાતના તમામ જિલ્લામાં વરસાદની આગાહી કરવામાં આવી છે.
તાપમાનમાં મોટો ફેરફાર રહેશે
અમદાવાદ સહિતના વિસ્તારોમાં છૂટાછવાયા વરસાદની આગાહી કરવામાં આવી છે. રાજ્યના 18 શહેરમાં લઘુતમ તાપમાન 20 ડિગ્રી નીચે નોંધાયું છે. હવામાન વિભાગના જણાવ્યા મુજબ આગામી 7 દિવસ તાપમાનમાં મોટો ફેરફાર રહેશે.
વેસ્ટર્ન ડિસ્ટર્બન્સની અસર વર્તાશે
વલસાડ, વાપી, ઉદવાડા, ધરમપુર અને સેલવાસના વાતાવરણમાં બદલાવ સાથે છૂટોછવાયો વરસાદ વરસી શકે છે. 25 અને 26મી સુધીમાં સૌરાષ્ટ્ર-કચ્છના વિસ્તારોમાં માવઠું વરસી શકે છે. જ્યારે સાર્વત્રિક નહીં પણ છૂટોછવાયો વરસાદ વરસી શકે છે. 22મી થી વેસ્ટર્ન ડિસ્ટર્બન્સની અસર વર્તાશે. મજબૂત ડિસ્ટર્બન્સને કારણે ઉત્તરના પર્વતીય વિસ્તારમાં હિમવર્ષા થાય તેવી પણ ભીતિ જોવા મળી રહી છે. હાલ આ આગાહીને લઈને ખેડૂતોની ચિંતા કરી રહ્યાં છે. જીરૂ, ધાણા અને તૈયાર થયેલા પાકને નુકસાનની ભીતિ જોવા મળી રહી છે.
