- રાજ્યમાં ગરમીથી મળશે આંશિક રાહત
- હવામાન વિભાગની આગાહી
- બે દિવસ વાદળછાયું વાતાવરણ રહેશે
રાજ્યમાં આગામી બે દિવસ પવનોની ગતિ તેજ રહેતા ગરમીથી આંશિક રાહત મળી શકે છે. હવામાન વિભાગે આગાહી કરી છે કે રાજ્યમાં આગામી બે દિવસ વાદળછાયું વાતાવરણ અને વરસાદી માહેલ રહેશે.દક્ષિણ ગુજરાત અને સૌરાષ્ટ્રમાં પવનોની ગતિ તેજ રહેશે.. પ્રિ મોન્સૂન એક્ટિવિટી ન થતા વરસાદની શકયતા નહિવત છે તેવું હવામાન વિભાગે જણાવ્યું હતું.
ખેડૂતો માટે સારા સમાચાર
જગતના તાત માટે રાહતના સમાચાર રાજ્યના હવામાન વિભાગ દ્વારા આપવામાં આવ્યા છે આ વર્ષે ચોમાસુ દેશભરમાં સારું રહેવાનું પૂર્વાનુમાન હવામાન વિભાગ દ્વારા વ્યકત કરવામાં આવ્યું છે સમગ્ર દેશમાં 103 ટકા જેટલો વરસાદ પડી શકે છે મહત્વનું છે કે ગુજરાતમાં પણ આ વર્ષે ચોમાસુ સારું રહેવાનું અનુમાન હવામાન વિભાગ તરફથી વ્યક્ત કરવામાં આવ્યું છે જૂન મહિનામાં ચોમાસું સત્તાવાર રીતે ગુજરાતમાં બેસી જશે અને જૂન મહિનામાં જ સામાન્ય વરસાદથી ચોમાસાની શરૂઆત ગુજરાતના સૌરાષ્ટ્ર અને દક્ષિણ ગુજરાતના ભાગોમાં જોવા મળશે મહત્વનું છે કે હાલ કેરળમાં ચોમાસુ 1 જૂનથી બેસી ગયું છે.
ગુજરાતમાં તારીખ 15થી 20 જૂન વચ્ચે ચોમાસું બેસી શકે છે
બીજી બાજુ તાજેતરમાં જ ભારતીય હવામાન વિભાગ દ્વારા પણ વરસાદને લઇને મોટી આગાહી કરવામાં આવી છે. જેમાં કહેવાયું કે, કેરળમાં 3 દિવસ પહેલાં ચોમાસું બેસશે. કેરળમાં ચોમાસાએ પ્રવેશ કરી દીધો. સત્તાવાર રીતે હવામાન વિભાગની ચોમાસાને લઈ મહત્વની જાહેરાત કરાઇ છે. ગુજરાતમાં તારીખ 15થી 20 જૂન વચ્ચે ચોમાસું બેસી શકે છે.
ગુજરાતમાં 15 જૂનથી નિયમિત ચોમાસું શરૂ થવાની સંભાવના: અંબાલાલ
ઉલ્લેખનીય છે કે, બીજી બાજુ હવામાન નિષ્ણાંત અંબાલાલ પટેલે પણ ગઇ કાલે વરસાદને લઇને આગાહી કરી છે. અંબાલાલની આગાહી અનુસાર, તારીખ 10 જૂન સુધીમાં ઉત્તર ગુજરાતમાં વરસાદની આગાહી છે. આ સાથે ગુજરાતમાં 15 જૂનથી નિયમિત ચોમાસું શરૂ થવાની સંભાવના છે. 3 જુલાઈના રોજ ગુજરાતમાં સારા વરસાદની આગાહી છે. સાથે મધ્ય ગુજરાતમાં પણ ભારે વરસાદ થવાની સંભાવના છે. ઉપરાંત ઉત્તર ગુજરાતના અરવલ્લી, દક્ષિણ ગુજરાત અને ઉત્તર સૌરાષ્ટ્રમાં પણ સારો વરસાદ રહેવાની શક્યતા છે. સૌરાષ્ટ્રના દરિયા કિનારા વિસ્તારમાં 40 ઈંચ જેટલો વરસાદ થવાની શક્યતા છે. સાથે જૂન મહિનામાં ગુજરાતના કેટલાભ ભાગોમાં 6 ઈંચ વરસાદ થવાની સંભાવના સેવાઈ રહી છે. ઉપરાંત જુલાઈ મહિનામાં 12 ઈંચ વરસાદ થવાની શક્યતા છે. સાથે જ દક્ષિણ ગુજરાતમાં ઓગષ્ટ મહિના દરમિયાન 8 ઈંચ વરસાદ થવાની સંભાવના છે.
