રેસિપી / ગણેશજીને ધરાવો કેસર પેંડાનો ભોગ, 5 મિનિટમાં ઘરે જ થઈ જશે તૈયાર

મોદક અને ચુરમાના લાડુના ભોગ ધરાવ્યા બાદ તમે આ પેંડાનો ભોગ પણ ધરાવી શકો છો. શુદ્ધ મનથી ધરાવેલા ભોગથી ગણેશજી ચોક્કસ પ્રસન્ન થાય છે. કેસર પેંડા બનાવવા  માટે તમારે થોડી જ ચીજોની જરૂર રહેશે. અને ફટાફટ તૈયાર થઈ જશે તમારા ભોગમાં ચઢાવવાના પેંડા.

સામગ્રી

2 કપ મિલ્ક પાવડર
1.5  કપ કન્ડેન્સ મિલ્ક
3 ચમચા ગરમ દૂધ
8-10 કેસરના તાંતણા
2 ચમચી ઘી
1 ચમચી એલચીનો પાવડર
ગાર્નિશિંગ માટે બદામ કે કેસરના તાંતણા કે ડ્રાય ફ્રૂટ

રીત

એક વાટકીમાં ગરમ દૂધ લો અને તેમાં કેસરના તાંતણા નાંખીને તેને અડધો કલાક માટે બાજુ પર રાખો. જેથી તે દૂધમાં ભળી જશે અને કેસરી રંગનું દૂધ તૈયાર થશે. હવે એક નોન સ્ટિક પેન લો અને તેમાં કન્ડેન્સ્ડ મિલ્ક, મિલ્ક પાવડર અને કેસર વાળું દૂધ મિક્સ કરો. ગેસને ચાલુ કરીને મીડિયમ ફ્લેમ પર આ દરેક ચીજને કૂક કરી લો. જો મિક્સર ચોંટવા લાગે તો તેમાં થોડું ઘી ઉમેરો અને તેને સતત હલાવતા રહો. લગભગ 5 મિનિટ થાય એટલે તમારું મિક્સર એક ગોળા જેવું બનશે. તેમાં એલચીનો પાવડર મિક્સ કરી લો. તેને સતત ઠંડું થવા દો. ઠંડુ થાય એટલે તેમાંથી નાના નાના લૂઆ બનાવો અને તેમાંથી પેંડા બનાવો. પેંડા બનાવવા હાથ પર થોડું ઘી લગાવી લો અને ગોળા બનાવો. ગોળો બન્યા પછી અંગૂંઠાથી તેને વચ્ચે પ્રેસ કરો. જેથી એક નાનો ખાડો જેવું બનશે અને પેંડા થોડા ચપટા પણ બની જશે. તે ખાડામાં બદામ, કેસર કે ઈચ્છા પ્રમાણેના ડ્રાયફ્રૂટ્સથી ડેકોરેટ કરી લો. તૈયાર થઈ જશે તમારા ઘરે જ બનાવેલા કેસર પેંડા.  તેને તમે ગણેશજીને ભોગ ધરાવી શકો છો. થાળીમાં ગોઠલી દીધા બાદ તમે તે થાળીને ગુલાબની પાંદડીઓથી પણ સજાવી શકો છો.