- પૂર્વ નાયબ વડાપ્રધાન લાલકૃષ્ણ અડવાણીને મળશે ભારત રત્ન
- ભારત રત્ન સન્માન મળ્યા બાદ લાલ કૃષ્ણ અડવાણીને મળશે અનેક સુવિધાઓ
- પુરસ્કારથી સન્માનિત વ્યક્તિને રેલવે તરફથી મળે છે મફત મુસાફરીની સુવિધા
Lal Krishna Advani Bharat Ratna : આપણાં દેશના પૂર્વ નાયબ વડાપ્રધાન લાલકૃષ્ણ અડવાણીને લઈ તાજેતરમાં જ મોદી સરકારે ભારત રત્ન આપવાની જાહેરાત કરી છે. આ જાહેરાત થતાંની સાથે જ તમારા મનમાં એ સવાલ જરૂર થતો હશે કે ભારત રત્ન એવોર્ડ શું હોય છે અને આ એવોર્ડ કોને આપવામાં આવે છે ? આ સાથે આ એવોર્ડ મેળવનારને શું-શું લાભ મળે છે ? આજે અમે તમને જણાવીશું તમને ઉદ્ભવતા તમામ સવાલોના જવાબો વિશે.
દેશના વડાપ્રધાન નરેન્દ્ર મોદીએ ટ્વિટ કરીને કહ્યું હતું કે, ભાજપ નેતા લાલકૃષ્ણ અડવાણીને ભારત રત્ન આપવામાં આવશે. તેઓ આપણા સમયના સૌથી આદરણીય રાજનેતાઓમાંના એક છે. ભારતના વિકાસમાં તેમનું યોગદાન અવિસ્મરણીય છે. તેમના જીવનની શરૂઆત પાયાના સ્તરે કામ કરવાથી લઈને આપણા નાયબ વડાપ્રધાન તરીકે દેશની સેવા કરવા સુધીની છે.
શું છે ભારત રત્ન એવોર્ડ ?
'ભારત રત્ન' દેશનો સર્વોચ્ચ નાગરિક પુરસ્કાર છે. આ એવોર્ડ એવી વ્યક્તિને આપવામાં આવે છે જેણે કોઈપણ ક્ષેત્રમાં અસાધારણ અને સર્વોચ્ચ સેવા આપી હોય. આ પુરસ્કાર જાતિ, વ્યવસાય, સ્થિતિ અથવા લિંગને ધ્યાનમાં લીધા વિના ઉત્કૃષ્ટ કાર્ય માટે આપવામાં આવે છે. આ એવોર્ડની શરૂઆત 2 જાન્યુઆરી, 1954ના રોજ દેશના પ્રથમ રાષ્ટ્રપતિ ડૉ. રાજેન્દ્ર પ્રસાદ દ્વારા કરવામાં આવી હતી. આ સન્માન જીવિત અને મરણોત્તર લોકોને આપવામાં આવે છે. આ સન્માન વર્ષમાં વધુમાં વધુ 3 લોકોને જ આપવામાં આવે છે.
વધુ વાંચો: PM મોદી CM હતા ત્યારે અડવાણીએ જ ખુરશી બચાવી હતી...: ભારત રત્ન મુદ્દે કોંગ્રેસના મોટા નેતાનો કટાક્ષ
કઈ સુવિધાઓ ઉપલબ્ધ છે?
'ભારત રત્ન'થી સન્માનિત વ્યક્તિને ઘણી સરકારી સુવિધાઓ મળે છે. આ પુરસ્કારથી સન્માનિત વ્યક્તિને રેલવે તરફથી મફત મુસાફરીની સુવિધા મળે છે. તેમજ ભારત રત્નથી સન્માનિત વ્યક્તિને મહત્વપૂર્ણ સરકારી કાર્યક્રમોમાં ભાગ લેવા માટે આમંત્રિત કરવામાં આવે છે. ઉપરાંત સરકાર તેમને વોરંટ ઓફ પ્રેસિડેન્સીમાં સ્થાન આપે છે. પ્રોટોકોલમાં ભારત રત્ન વ્યક્તિ રાષ્ટ્રપતિ, ઉપરાષ્ટ્રપતિ, વડા પ્રધાન, રાજ્યપાલ, ભૂતપૂર્વ રાષ્ટ્રપતિ, નાયબ વડા પ્રધાન, મુખ્ય ન્યાયાધીશ, લોકસભા અધ્યક્ષ, કેબિનેટ પ્રધાન, મુખ્યમંત્રી, પૂર્વ વડાપ્રધાન અને સંસદના બંને ગૃહોમાં વિપક્ષના નેતા બાદ આ પદ આપવામાં આવે છે.
