PM ડિગ્રી મામલો / કેજરીવાલને લાગ્યો 'કરન્ટ', અમદાવાદ કોર્ટે ફગાવી ગુનાહિત માનહાની કેસ પર સ્ટેની અરજી

• દિલ્હીનાં મુખ્યમંત્રી અરવિંદ કેજરીવાલને મોટો ઝટકો
• ગુજરાત યુનિ. દ્વારા દાખલ કરેલ માનહાનિનાં કેસ મામલો
• કોર્ટે માનહાનિ કેસ મામલે સ્ટે આપવાની અરજી ફગાવી

 અમદાવાદની કોર્ટે દિલ્હીના મુખ્યમંત્રી અરવિંદ કેજરીવાલ અને આમ આદમી પાર્ટી (AAP) ના રાજ્યસભાના સભ્ય સંજય સિંહની ફોજદારી માનહાનિના કેસમાં તેમની સામે ચાલી રહેલા ટ્રાયલ પર વચગાળાના સ્ટેની અરજીને ફગાવી દીધી છે. સેશન્સ જજ એ.જે. કાનાનીની કોર્ટે વડાપ્રધાન નરેન્દ્ર મોદીની ડિગ્રી અંગેના તેમના "વ્યંગાત્મક" અને "અપમાનજનક" નિવેદનો બદલ ગુજરાત યુનિવર્સિટી દ્વારા દાખલ કરાયેલ ફોજદારી માનહાનિના કેસમાં મેટ્રોપોલિટન કોર્ટ દ્વારા ટ્રાયલ પર વચગાળાના સ્ટે માટેની AAP નેતાઓની અરજી ફગાવી દીધી હતી.

આ મામલાની વધુ સુનાવણી 21 ઓગસ્ટનાં રોજ કરવામાં આવશે

તેમના વકીલ પુનિત જુનેજાએ સોમવારે જણાવ્યું હતું કે સામે પક્ષે ગુજરાત યુનિવર્સિટીએ સમય માંગ્યા બાદ  અદાલતે શનિવારે આદેશ જાહેર કર્યો કે આ મામલાની વધુ સુનાવણી 21 ઓગસ્ટનાં રોજ કરવામાં આવશે. જે બાદ જુનેજાએ જણાવ્યું હતું કે કેજરીવાલ અને સિંહને માનહાનિના કેસમાં કોર્ટનાં સમન્સને પડકારતી રિવિઝન અરજી સેશન્સ કોર્ટમાં દાખલ કરી હતી. જેમાં તેઓએ કોર્ટ પાસે વચગાળાની રાહત માંગી હતી. જેને કોર્ટે ફગાવી દીધી હતી.

કેજરીવાલ સામે યુનિ.એ નોંધાવ્યો હતો ગુનો
દિલ્હીના મુખ્યમંત્રી અરવિંદ કેજરીવાલ સામે ગુજરાત યુનિવર્સિટીએ ગુનો નોંધાવ્યો હતો. PMની ડિગ્રી મુદ્દે અરવિંદ કેજરીવાલની મુશ્કેલીમાં વધારો થયો છે. અરવિંદ કેજરીવાલે PMની ડિગ્રીને લઈ સવાલો ઉઠાવ્યા હતા જે ડિગ્રી અંગે ગુજરાત યુનિવર્સિટી સામે સવાલો ઉઠાવ્યા હતા. 1 એપ્રિલે કેજરીવાલે આપેલા નિવેદનને લઈને યુનિવર્સિટીએ ફરીયાદ કરી હતી.