- કેનેડાના પ્રધાનમંત્રી જસ્ટિન ટ્રુડોના ફરી ભારત પર આરોપ
- 'કેનેડિયન નાગરિકની હત્યામાં ભારત સરકારના એજન્ટો સામેલ'
- 'કેનેડા એવો દેશ છે જે હંમેશા કાયદાનું પાલન કરે છે'
India Canada Controversy: કેનેડાના વડાપ્રધાન જસ્ટિન ટ્રુડોએ ખાલિસ્તાની આતંકવાદી હરદીપ સિંહ નિજ્જરની હત્યાને લઈને ભારત પર ફરી એકવાર આક્ષેપ કર્યો છે. એક પત્રકારે ટ્રુડોને પૂછ્યું કે કેનેડાની ધરતી પર તેમના જ નાગરિક નિજ્જરની હત્યાની તપાસ ક્યાંથી સુધી પહોંચી. તપાસમાં કોઈ પ્રગતિ ન હોય તો શું અમેરિકાએ ભારત પ્રત્યે કેનેડા વતી કડક વલણ અપનાવવું જોઈએ? તેના જવાબમાં જસ્ટિન ટ્રુડોએ ફરી એ જ જૂના આરોપોનું પુનરાવર્તન કર્યું જે તેમણે કેનેડાની સંસદમાં ભારત પર લગાવ્યા હતા
'અમે ખૂબ ગંભીરતાથી લઈ રહ્યા છીએ'
જસ્ટિન ટ્રુડોએ કહ્યું કે, શરૂઆતથી જ અમે આ વિશ્વનીય આરોપોથી વાકેફ થયા કે કેનેડાની ધરતી પર કેનેડિયન નાગરિકની હત્યામાં ભારત સરકારના એજન્ટો સામેલ છે. ત્યારે અમે ભારતનો સંપર્ક કર્યો અને તેમને આ મામલાના તપાસ કરવા કહ્યું હતું. તેમજ સહકાર આપવા વિનંતી કરી તેમજ તપાસમાં અમને સાથ આપવાનું કહ્યું હતું. તેમણે વધુમાં કહ્યું કે, અમે આંતરરાષ્ટ્રીય કાયદા અને કેનેડિયન સાર્વભૌમત્વના આ ગંભીર ઉલ્લંઘન પર કાર્યવાહી કરવા માટે યુનાઇટેડ સ્ટેટ્સ અને અમારા અન્ય મિત્ર દેશોનો પણ સંપર્ક કર્યો હતો. અમે ખૂબ ગંભીરતાથી લઈ રહ્યા છીએ.
'કેનેડા કાયદાનું પાલન કરે છે'
કેનેડાના પ્રધાનમંત્રીએ કહ્યું કે, અમે અમારા તમામ સહયોગીઓ અને ભાગીદારો સાથે કામ કરવાનું ચાલુ રાખીશું, તપાસ એજન્સીઓ તેમનું કામ કરતી રહેશે. તેમણે કહ્યું કે, કેનેડા એવો દેશ છે જે હંમેશા કાયદાનું પાલન કરે છે અને તેના માટે અડીખમ રહે છે. સત્તા સાચા-ખોટાનો નિર્ણય લઈ શકે નહી. જો મોટા દેશો કોઈપણ પરિણામની ચિંતા કર્યા વિના આંતરરાષ્ટ્રીય કાયદાઓનું ઉલ્લંઘન કરશે તો સમગ્ર વિશ્વ માટે જોખમી બની જશે. કેનેડાના ચંદન આર્ય દ્વારા પાર્લામેન્ટ હિલ પર આયોજિત કાર્યક્રમમાં કેનેડામાં ભારતના હાઈ કમિશનર સંજય કુમાર વર્માને આમંત્રિત કરવાના સવાલ પર જસ્ટિન ટ્રુડોએ કહ્યું કે, અમે એકદમ સ્પષ્ટ છીએ કે અમે કામ કરવા ઈચ્છીએ છીએ. આ ગંભીર મામલે ભારત સાથે રચનાત્મક રીતે અમે આના તળિયે જવા માટે ભારત સરકાર અને વિશ્વભરના અમારા સાથીદારો સાથે સંપર્ક કર્યો છે. જેથી જ જ્યારે ભારતે વિયેના સંમેલનનું ઉલ્લંઘન કર્યું અને 40થી વધુ કેનેડિયન રાજદ્વારીઓની પ્રતિરક્ષાને રદ કરી ત્યારે અમે ખૂબ જ નિરાશ થયા હતા.
'વિશ્વભરના દેશો માટે આ ચિંતાનો વિષય'
જસ્ટિન ટ્રુડોએ કહ્યું, અમારા દ્રષ્ટિકોણથી આ બાબત પર વિચારો. કેનેડાની ધરતી પર કેનેડિયન નાગરિકની હત્યામાં ભારત સરકારના એજન્ટો સામેલ હોઈ શકે છે એવું માનવા માટે અમારી પાસે ગંભીર કારણો છે. જેના પર ભારતનો જવાબ વિયેના કન્વેન્શનનું ઉલ્લંઘન કરીને કેનેડિયન રાજદ્વારીઓના કાઢવાનો હતો. વિશ્વભરના દેશો માટે આ ચિંતાનો વિષય છે. જ્યારે કોઈ દેશને લાગે છે કે તેના રાજદ્વારીઓ બીજા દેશમાં સુરક્ષિત નથી, ત્યારે આ સ્થિતિ આંતરરાષ્ટ્રીય સંબંધોને વધુ ખતરનાક અને ગંભીર બનાવે છે.
