- બોલર જસપ્રીત બુમરાહ ફીટનેસ પર કરી રહ્યાં છે કામ
- NCA નેટ અભ્યાસમાં 7 ઓવરની કરી બોલિંગ
- આવતા મહિને પ્રેક્ટિસ મેચમાં થશે ફીટનેસ ચેક
ક્રિકેટનાં ફેન્સ માટે સારા સમાચાર છે. ટૂંક સમયમાં ટીમ ઈન્ડિયાનાં સ્ટાર ખેલાડી બુમરાહ ઈન્ટરનેશનલ મેચમાં પોતાની વાપસી કરી શકે છે. હાલમાં ભારતીય ક્રિકેટ ટીમનાં તેજ બોલર જસપ્રીત બુમરાહે રાષ્ટ્રીય ક્રિકેટ અકાદમી NCAમાં નેટ અભ્યાસ દરમિયાન 7 ઓવરની બોલિંગ કરી છે. તેમના આ પ્રેક્ટિસ સેશન્સને જોયા બાદ શક્ય છે કે તેઓ ટૂંક સમયમાં મેચમાં પોતાની વાપસી કરે. અનેક રિપોર્ટસ્ દાવો કરી રહ્યાં છે કે બુમરાહ આયરલેન્ડની સામેની સીરીઝથી ઈન્ટરનેશનલ ક્રિકેટમાં વાપસી કરશે.
બુમરાહ મેચમાં વાપસી ક્યારે કરશે ?
રિપોર્ટ કહે છે કે આ પ્રકારની ઈજા કેટલા સમયમાં રિકવર થઈ જાય તેનો ચોક્કસ સમય જણાવવો મુશ્કેલ છે પરંતુ હાલમાં NCAની નેટ પર બુમરાહે સાત ઓવરની બોલિંગ કરી છે. તેમનું આ પર્ફોર્મન્સ જોઈને કહી શકાય કે તેઓ પોતાની ફીટનેસ પર કામ કરી રહ્યાં છે. માહિતી અનુસાર તેઓ આવતા મહિને NCAમાં કેટલીક પ્રેક્ટિસ મેચ રમશે જે દરમિયાન તેમની ફિટનેસનું પરીક્ષણ કરવામાં આવશે.
'મોટી મેચો પહેલા ઘરેલૂ મેચમાં રમવું જોઈએ'
ટીમ ઈન્ડિયાનાં પૂર્વ 'સ્ટ્રેંથ એન્ડ કંડીશનિંગ' કોચ રામજી શ્રીનિવાસને કહ્યું કે બુમરાહની વાપસીમાં ઘણી સાવચેતી રાખવી જોઈએ. NCAમાં પ્રેક્ટિસ મેચ રમવું સારો સ્ટેપ છે કારણ કે તેનાથી તેમના શરીરને મેચની માંગ અનુરૂપ તૈયાર કરવામાં મદદ મળશે. મોટી મેચોનાં સ્તર પર પાછા લાવવા પહેલાં તેમણે કેટલીક ઘરેલૂ મેચોમાં રમવું જોઈએ.
બુમરાહ હતાં ઈજાગ્રસ્ત
બુમરાહને પીઠમાં વારંવાર દુ:ખાવો થઈ રહ્યો હતો જેની સર્જરી માર્ચ મહિનામાં ન્યૂઝીલેન્ડમાં કરવામાં આવી હતી. બુમરાહે પોતાની છેલ્લી મેચ સપ્ટેમ્બર 2022માં ઑસ્ટ્રેલિયાની સામે ઘરેલૂ ટી20 આંતરરાષ્ટ્રીય મેચ દરમિયાન રમી હતી.
