નિવેદન / જમ્મુ-કાશ્મીર DDC ચૂંટણી પરિણામ : ઓમર અબ્દુલ્લાએ કહ્યું ભાજપે હવે સમજી જવું જોઈએ, જનાદેશ અમારી સાથે છે

• કાશ્મીરના ચૂંટણી પરિણામોને લઈને ઓમરનું નિવેદન 
• NC ના ઉપપ્રમુખે કહ્યું,'આ પરિણામોએ ભાજપના પ્રચારને ફગાવી દીધો'
• જમ્મુ કાશ્મીરના સ્થાનિક જિલ્લા પરિષદની ચૂંટણીના આવ્યા પરિણામ 

કાશ્મીરની સ્થાનિક ચૂંટણીઓમાં જીતથી પ્રોત્સાહિત NC ના વાઇસ પ્રેસિડેન્ટ ઓમર અબ્દુલ્લાએ કહ્યું છે કે આ ચૂંટણી પરિણામો એવા લોકોનો પ્રતિસાદ છે જેમણે કહ્યું કે અમને કાશ્મીરમાંથી ભૂંસી દેવામાં આવ્યા છે. આ પરિણામો તે લોકો માટે એક પાઠ છે જેમણે આક્ષેપ કર્યો હતો કે અમે કુટુંબ અને માત્ર કુટુંબની પાર્ટી છીએ.

કલમ 370 ની પુન: સ્થાપના માટેના પરિણામ : ઓમાર 

ઓમર અબ્દુલ્લાએ કહ્યું કે હવે અમારી પાસે જનાદેશ છે કે અમે ઓગસ્ટ 2019 માં જમ્મુ-કાશ્મીર ની પરિસ્થિતિમાં થયેલા બદલાવ સામે લડી શકીએ અને કલમ 370 ની પુન:સ્થાપના માટે સંઘર્ષ કરી શકીએ. કલમ 370 ના અંત પછી પ્રથમ ચૂંટણીના પરિણામો પર પ્રતિક્રિયા આપતાં ઓમર અબ્દુલ્લાએ કહ્યું કે તે અમારા માટે મુશ્કેલ કામ હતું. ગયા વર્ષના આ સમય સુધી, અમે જેલમાં બંધ હતા.અમે ચૂંટણીમાં જોડાવાનું નક્કી કર્યું ત્યાં સુધીમાં ચૂંટણીની ઘોષણા થઈ ચૂકી હતી.

ઓમર અબ્દુલ્લાએ કહ્યું કે કેટલાક લોકો જે પોતાને જમ્મુ-કાશ્મીરના નિષ્ણાંત માને છે તેઓ કહેતા હતા કે નેશનલ કોન્ફરન્સ અને પીડીપી ભૂંસાઈ ગઈ છે. આ લોકો હવે નહીં રહે, આ લોકો પરિવારના નેતાઓ છે, જનતા તેમની સાથે નથી. પરંતુ આજના પરિણામો સાથે, આ બધી ધારણાઓનો નાશ કરવામાં આવ્યો છે.  કલમ 370 ના સંદર્ભે ઓમરે કહ્યું કે અમે આ ચૂંટણીને પ્રજામત નથી બનાવ્યો, પરંતુ તેઓએ આ હોવાનું કહ્યું હતું અને હવે જ્યારે ચૂંટણીનાં પરિણામો આવ્યા છે, ત્યારે તેમણે આનો જવાબ આપવો જોઈએ.

આ ચૂંટણીનો સંદેશ શું છે?

ઓમર અબ્દુલ્લાએ કહ્યું કે આ પરિણામોનો સંદેશ સ્પષ્ટ છે અને સંદેશ એ છે કે લોકો કલમ 370 માં કરવામાં આવેલા ફેરફારો અને 2019 માં રદ્દ કરેલા વિશેષ દરજ્જાને સ્વીકારતા નથી અને લોકો ભાજપના તે પ્રચારને પણ સ્વીકારતા નથી કે જેમાં તેઓ કહે છે કે J&K ના લોકો કલમ 370 રદ્દ કરવાની તરફેણમાં છે. 

હવે ગુપકાર ગઠબંધન શું કરશે ?

આ ચૂંટણી પરિણામો પછી, ગુપકાર એલાયન્સનું આગળનું પગલું શું હશે આ સવાલના જવાબમાં ઓમર અબ્દુલ્લાએ કહ્યું કે હવે અમારી પાસે કલમ 370 ને હટાવવાની વિરુદ્ધ સંઘર્ષનો જનાદેશ છે. અમે કલમ 370 ની પુન:સ્થાપના માટે સંઘર્ષ ચાલુ રાખીશું.