- ચૂંટણીને લઇ રાજકીય પક્ષો એક્શનમાં
- શિક્ષણ નીતિ પર બોલ્યાં ઇસુદાન ગઢવી
- 4 વર્ષમાં ખાનગી શાળાઓમાં 20 ટકાથી વધુ ફી વધી
ગુજરાત શિક્ષણ નીતિને લઇ AAP નેતા ઇસુદાન ગઢવીનું નિવેદન
2022નું વર્ષ અંત સુધીમાં ગુજરાત વિધાનસભાની ચૂંટણીનું બ્યુગલ ફૂંકાઈ જશે ત્યારે અત્યારથી જ ચૂંટણીના લઈને વિવિધ રાજકીય પક્ષો એક્શનમાં આવી રહ્યાં છે. જેની વચ્ચે ગુજરાતી શિક્ષણ નીતિને લઇ AAP નેતા ઇસુદાન ગઢવીએ મહત્વનું નિવેદન આપતાં જણાવ્યું હતું કે, ગુજરાતમાં છેલ્લા 4 વર્ષમાં ખાનગી શાળાઓમાં 20 ટકાથી વધુ સ્કૂલ ફી વધી છે.
ભાજપના નેતાઓની મિલીભગતથી ફી વધે છે: ગઢવી
તેઓએ વધુમાં જણાવ્યું હતું કે, ગુજરાતમાં ભાજપના નેતાઓની મિલીભગતથી ફી વધી રહી છે. મહત્વનું છે કે, રાજ્યમાં છેલ્લા બે વર્ષો ઓનલાઇન શિક્ષણ ચાલી રહ્યું છે. તેમ છતાં પણ ફી નથી ઘટી. તેમણે વધુમાં ઉમેર્યું હતું કે , હાલમાં જ ચૂંટાયેલી પંજાબમાં ભગવંત માનની સરકારએ સત્તા પર આવતાં જ મોટો નિર્ણય લીધો છે. ભગવંત માને જણાવ્યું હતું કે, પંજાબમાં કોઇપણ ખાનગી શાળા આ સત્રમાં ફી વધારો કરી શકશે નહીં. શિક્ષણના ક્ષેત્રે આમ આદમી પાર્ટી ક્રાંતિકારી નિર્ણયો લઇ રહી છે
ગુજરાત સરકાર FRCમાં વાલીઓને સ્થાન આપે: ગઢવી
તેમણે વધુમાં ઉમેર્યું હતું કે, ગુજરાત સરકાર FRCમાં વાલીઓને સ્થાન આપે તેમજ જો આગામી દિવસોમાં ફી વધારો પાછો નહીં ખેંચાય તો આમ આદમી પાર્ટી ઉગ્ર આંદોલન કરશે. આ સાથે કોંગ્રેસના નેતા ઇન્દ્રનીલ રાજ્યગુરૂને લઇ ઇસુદાન ગઢવી પોતાની પ્રતિક્રિયા આપતાં જણાવ્યું હતું કે, કોઈપણ સારા લોકો આવે તો અમે તેમને જોડાવા માટે આવકારીએ છીએ
