આદેશ / ગુજરાત હાઇકોર્ટનું કડક વલણ: IPS રવિ તેજાને તાત્કાલિક હાજર થવાનું ફરમાન, જાણો શું છે સમગ્ર કેસ

• જૂનાગઢ પોલીસ ડ્રાઈવરના રહસ્યમય મૃત્યુનો મામલો
• IPS રવિ તેજાને હાજર થવા HCનું ફરમાન
• IPS રવિ તેજા જૂનાગઢ SP તરીકે હતા કાર્યરત

જૂનાગઢ પોલીસ ડ્રાઈવરના રહસ્યમય મૃત્યુ મામલે ગુજરાત હાઈકોર્ટે IPS રવિ તેજાને તાત્કાલિક હાજર થવા આદેશ કર્યો છે. પોલીસ ડ્રાઈવર બ્રિજેશ લાવડિયાની લટકતી હાલતમાં લાશ મળી આવી હતી. મૃતકના શરીર પર માર માર્યાના પણ નિશાન જોવા મળ્યા હતા.બાદમાં જૂનાગઢમાં પોલીસ સામે આક્ષેપો લાગ્યા હતા. મહત્ત્વનું છે કે અધિકારીઓની બેદરકારીના કારણે બનેલી ઘટનાની કોર્ટે ગંભીર નોંધ લઈ જવાબદારોની ઝાટકણી કાઢી છે. આ ઘટના બન્યાના 5 મહિના બાદ પણ ફરિયાદ ન નોંધાતા કોર્ટે નારાજગી વ્યકત વ્યકત કરી હતી. 

આરોપી અને તપાસ કરનાર એકજ હોય તો કેવી રીતે નિષ્પક્ષ તપાસ થશે?: HC

કોર્ટે એવું જણાવ્યું હતું કે આરોપી અને તપાસ કરનાર એક જ હોય તો કેવી રીતે નિષ્પક્ષ તપાસ થશે? કોર્ટેના જૂનાગઢ ડીએસપી રવિ તેજા વાસમ શેટ્ટી અને પીઆઇ એમ.એમ.વાઢેરને આવતીકાલે સવારે 11 વાગ્યે રૂબરૂ હાજર રહેવા ફરમાન કર્યું છે.

શું હતો સમગ્ર કેસ?
જૂનાગઢ પોલીસ ડ્રાઇવર બ્રીજેશભાઇ લાવડિયાની વંથલી પોલીસ મથકની એક વાડીમાંથી રહસ્યમય સંજોગોમાં મૃતદેહ મળી આવ્યો હતો. બાદમાં મૃતકના શરીર પર ગંભીર ઇજાના નિશાન હોવાથી માર મારી તેની હત્યા કરવામાં આવી હોવાની શંકા જન્મી હતી. જોકે આ દરમિયાન બ્રીજેશભાઇને ખૂબ માર મારવામાં આવ્યો હોવાની વાત તેઓએ પોતાના પુત્રને ફોન કરીને જણાવ્યું હતું. ખોટી રીતે ફસાવવામાં આવ્યો હોવાની વાત પણ કરી હતી. અને તારું તથા તારી માતાનું ધ્યાન રાખજે. એમ કહીને બ્રિજેશભાઈ ફોન કટ કર્યો હતો. આ પ્રકરણને લઈને મૃતકના પુત્રએ ન્યાયિક તપાસની માંગ સાથે હાઇકોર્ટમાં રિટ અરજી કરી હતી.