- આજે ભારત અને પાકિસ્તાન વચ્ચે નરેન્દ્ર મોદી સ્ટેડિયમમાં રમાશે મેચ
- પાકિસ્તાની ટીમ વર્લ્ડ કપમાં ભારતને સરળતાથી હરાવી દેશે - શોએબ અખ્તર
- પાકિસ્તાનની ટીમને નબળી બતાવો ત્યારે ખેલાડીઓ પરનું દબાણ દૂર થઈ જાય
ICC ક્રિકેટ વર્લ્ડ કપ 2023માં ભારત અને પાકિસ્તાન વચ્ચે આજે અમદાવાદના નરેન્દ્ર મોદી સ્ટેડિયમમાં બ્લોકબસ્ટર મેચ રમાશે. રોહિત શર્મા આ શાનદાર મેચમાં ટીમ ઈન્ડિયાની કેપ્ટનશીપ કરશે, જ્યારે પાકિસ્તાની ટીમની કમાન બાબર આઝમના હાથમાં રહેશે. મેચ આજે બપોરે 2 વાગ્યે શરૂ થશે.
આ મેચ નબળા દિલના કે કાયર લોકો માટે નથી - શોએબ અખ્તર
આ બધા વચ્ચે દિગ્ગજ પાકિસ્તાની ક્રિકેટર શોએબ અખ્તરે કહ્યું છે કે પાકિસ્તાની ટીમ વર્લ્ડ કપમાં ભારતને સરળતાથી હરાવી દેશે. તેની પાછળનું કારણ પણ જણાવવામાં આવ્યું છે. તેમનું માનવું છે કે મેચમાં ભારતીય ટીમ જેટલું દબાણ પાકિસ્તાન પર નહીં હોય. શોએબ અખ્તરે વધુમાં કહ્યું કે આ મેચ નબળા દિલના કે કાયર લોકો માટે નથી. આ મેચ બહાદુર લોકો માટે છે. જેઓ મોટું નામ કમાવા માંગે છે. જેઓ સુપરસ્ટાર બનવા માંગે છે.
પાકિસ્તાનની ટીમને નબળી બતાવો ત્યારે ખેલાડીઓ પરનું દબાણ દૂર થઈ જાય
એક વાતચીતમાં શોએબ અખ્તરે કહ્યું કે, 'ભારતીય ટીમને દરેક વખતે ફેવરિટ તરીકે રજૂ કરવી વાસ્તવમાં પાકિસ્તાન માટે મદદરૂપ સાબિત થાય છે. શોએબે પોતાનો અનુભવ શેર કરતા કહ્યું કે એકવાર તેણે એક ટીવી ચેનલ પર જોયું કે ક્રિકેટ શોમાં બધું જ બ્લૂ રંગનું હતું અને વારંવાર કહેવામાં આવી રહ્યું હતું કે ટીમ ઈન્ડિયા પાકિસ્તાનને ખરાબ રીતે હરાવશે. જ્યારે લોકો પાકિસ્તાનની ટીમને નબળી બતાવે છે ત્યારે ખેલાડીઓ પરનું દબાણ દૂર થઈ જાય છે.
પાકિસ્તાન માટે ભારતને હરાવવું સરળ રહેશે
શોએબ અખ્તરે આગળ કહ્યું કે, 'પાકિસ્તાનની ટીમ પાસે ગુમાવવા માટે કંઈ નથી. પાકિસ્તાન માટે ભારતને હરાવવું સરળ રહેશે કારણ કે આ તમારું હોમ ગ્રાઉન્ડ છે. તમારી પાસે ટીવી અધિકારો છે. તમારી સ્પોન્સરશિપ ચાલુ છે. એટલે તમે ફસાયેલ છો અમે નહીં.
ભારત માટે આ સૌથી મોટો અને શ્રેષ્ઠ વર્લ્ડ કપ
શોએબ અખ્તરે વધુમાં કહ્યું કે, 'આ યુદ્ધ નથી. વધુમાં વધુ ટીઆરપી મેળવવા માટે પાકિસ્તાન ભારતને મદદ કરવા તૈયાર છે. મારું માનવું છે કે ભારત માટે આ સૌથી મોટો અને શ્રેષ્ઠ વર્લ્ડ કપ હોવો જોઈએ. બાબર આઝમ અને ટીમે આક્રમકતા અને બુદ્ધિમત્તાથી રમવું જોઈએ. હું ટીમને કહેવા માંગુ છું કે તમે જીતશો. '
