- વિપક્ષ ગઠબંધન I.N.D.I.Aમાં પડી શકે છે તિરાડ
- CM મમતા બેનર્જીએ કોંગ્રેસ પર આરોપ મૂક્યો
- બાજવાએ પંજાબમાં આપ્યું ચોંકાવનારું નિવેદન
હજુ તો વિપક્ષ ગઠબંધન I.N.D.I.A સંપૂર્ણપણે કામ ચાલુ કરે તે પહેલાં જ તેમાં ખાડા પડવા માંડ્યા હોય તેવું લાગી રહ્યું છે. CM મમતા બેનર્જીએ આરોપ મૂક્યો કે,' પ.બંગાળમાં કોંગ્રેસ ભાજપ સાથે હાથ મળાવી રહી છે' તો પંજાબમાં બાજવા બોલ્યાં કે,' અમે AAPનાં સમર્થન વગર ચૂંટણી જીતશું.'
'કોંગ્રેસ બંગાળમાં ભાજપને ઓક્સિજન આપી રહી છે'
પશ્ચિમ બંગાળનાં મુખ્યમંત્રી મમતા બેનર્જીએ આજે ભાજપ સહિત કોંગ્રેસ પર પણ નિશાન સાધ્યું. તેમણે કોંગ્રેસ અને CPM પર આરોપ મૂકતાં કહ્યું કે,' બંને પાર્ટીઓએ પશ્ચિમ બંગાળમાં ભાજપની સાથે ગુપ્ત કરાર કરી લીધો છે. બંને પાર્ટીઓ ભાજપને બંગાળમાં ઓક્સિજન આપી રહી છે.'
પોતાના પર શરમ આવવી જોઈએ-મમતા
તેમણે કહ્યું કે," જ્યારે વિપક્ષ BJPનાં નેતૃત્વવાળી NDAનાં ગઠબંધનની સામે એકજૂથ થવાનાં પ્રયાસો કરી રહ્યું છે ત્યારે કોંગ્રેસ અને CPM પશ્ચિમ બંગાળમાં ભાજપને ઓક્સિજન આપી રહ્યાં છે. બંગાળમાં ભાજપ, કોંગ્રેસ અને માકપાની વચ્ચે ગુપ્ત કરાર થયાં છે. રાષ્ટ્રીય સ્તર પર અમે I.N.D.I.A મેળવવાનો પ્રયાસ કરી રહ્યાં છીએ જ્યારે પ.બંગાળમાં બીજે-ઈન્ડિયાનો પ્રયાસ થઈ રહ્યો છે." તેમણે કહ્યું કે," તેઓ ચુપચાપ પ.બંગાળમાં ભાજપ સાથે હાથ મળાવી રહ્યાં છે, તેમને શરમ આવવી જોઈએ. જો તેઓ આ પ્રકારની રણનીતિ ચાલુ રાખશે તો હું એ કહેવા મજબૂર થઈ જઈશ કે TMC પ.બંગાળમાં કોંગ્રેસ અને ભાજપની વિરોધમાં છે."
પંજાબમાં કોંગ્રેસ બોલી -અમે AAPનાં સમર્થનમાં નથી
તો બીજી તરફ પંજાબમાં વિપક્ષ નેતા પ્રતાપ સિંહ બાજવાએ કહ્યું કે," આવનારી લોકસભા ચૂંટણીમાં તેમની પાર્ટી રાજ્યની તમામ 13 સંસદીય સીટો પર એકલા જ ચૂંટણી લડશે અને આમ આદમી પાર્ટી સાથે કોઈ જ કરાર નહીં થાય." બાજવાનું આ નિવેદન એવા સમયે આવ્યું જ્યારે કોંગ્રેસ અને AAP એકજૂથ થઈને કેન્દ્રની ભાજપ અને NDA સામે લડી રહી છે. કોંગ્રેસે હાલમાં સદનમાં દિલ્હી સર્વિસ બિલનાં વિરોધમાં પણ આમ આદમી પાર્ટીને સમર્થન આપ્યું હતું.
