- સ્માર્ટ સિટી અમદાવાદમાં ફરી ભૂવારાજ
- અમદાવાદમાં વગર વરસાદે પડ્યો ભૂવો
- ભ્રષ્ટાચાર, તંત્રની બેદરકારી ખુલીને આવી સામે
સ્માર્ટ સિટી અમદાવાદ ચોમાસા દરમ્યાન તો ભુવનગરી બની જાય છે. પરંતુ હાલ વગર ચોમાસે પણ ભ્રષ્ટાચારના રોડથી ભૂવો પડ્યો હોવાનું સામે આવ્યું છે. પ્રાથમિક વિગતો મુજબ અમદાવાદના વિજય ચાર રસ્તા પાસે વગર વરસાદે ભૂવો પડ્યો છે. ડ્રેનેજ લાઈનમાં ભંગાણ થતાં ભૂવો પડ્યો હોવાનું સામે આવ્યું છે. જેને લઈ ભ્રષ્ટાચાર અને તંત્રની બેદરકારી ખુલીને સામે આવી છે.
અમદાવાદમાં વગર વરસાદે ભૂવો પડ્યાની ઘટના સામે આવી છે. વાત જાણે એમ છે કે, અમદાવાદના વિજય ચાર રસ્તા પાસે ડ્રેનેજ લાઈનમાં ભંગાણ થતાં ભૂવો પડ્યો હતો. જેને કારણે હવે સ્થાનિક દુકાનદારોને ભારે હાલાંકીનો સામનો કરવો પડી રહ્યો છે. ભ્રષ્ટાચાર અને તંત્રની બેદરકારીને કારણે અવારનવાર આવા ભૂવા પડતાં હોય છે.
સંભવિત રીતે દર વર્ષે AMC ભૂવા પાછળ અંદાજિત 5થી 7 કરોડ રૂપિયાનો ખર્ચ કરે છે. તો છેલ્લા 8 વર્ષમાં AMCએ 500થી વધુ ભૂવાનું રિપેરિંગ કર્યું હોવાનું પણ સામે આવ્યું હતું. જેની પાછળ 20 કરોડથી વધુ રૂપિયાનો ખર્ચ કર્યો હતો. જોકે આ બધામાં સૌથી વધુ ભૂવા પડે છે તો તે છે પશ્ચિમ વિસ્તાર. કેટલાક તો એવા ભૂવા છે જે દર વર્ષે એક જ સ્થળે પડે છે.
ભૂવા પડવાનું કારણ શું હોઈ શકે ?
એક તર્ક એવો પણ છે કે અમદાવાદની જમીન નદીની રેતીથી બનેલી છે. એટલે સરળતાથી ધોવાઈ જાય છે. વળી જમીનની અંદર નબળી ક્વોલિટીની પાઈપ અને તેના જોઈન્ટ લીક થવાથી રેતી ધોવાઈ જાય છે. અને એ સ્થળે ગાબડા પડે છે. ખરાબ ક્વોલિટીની પાઈપ, ખરાબ જોઈન્ટ, મેનહોલના ચણતરમાં ભંગાણ, ખોદકામથી પાઈપને થતું નુકસાન આ ગાબડાઓ માટે જવાબદાર છે. આ તમામ બેદરકારી પાછળ જવાબદાર છે AMCના અધિકારીઓ અને મળતિયાઓ. પણ હવે અમદાવાદ ફરી એકવાર સ્માર્ટસિટી ક્યારે બનશે તે જોવું રહ્યું.
