- રાજકોટની સ્કૂલનાં વિદ્યાર્થીનું હાર્ટ એટેકથી મોત
- ધો. 12 કોમર્સમાં અભ્યાસ કરતા વિદ્યાર્થીનું મોત
- ચાલુ ક્લાસે વિદ્યાર્થી ઢળી પડ્યો હતો
રાજકોટમાં આવેલ લાલ બહાદુર શાસ્ત્રી સ્કૂલમાં ધો. 12 માં અભ્યાસ કરતો વિદ્યાર્થી ચાલુ ક્લાસે ઢળી પડતા શિક્ષકોમાં દોડધામ મચી જવા પામી હતી. જે બાદ શિક્ષકો દ્વારા વિદ્યાર્થી મુદીત અક્ષયભાઈ નળિયાપરા (ઉવ.17) ને તાત્કાલિક સારવાર અર્થે હોસ્પિટલ ખસેડવામાં આવ્યો હતો. જ્યાં ફરજ પર હાજર તબીબે મુદીતને તપાસ્યા બાદ તેને મૃત જાહેર કર્યો હતો. ત્યારે હાલ તો વિદ્યાર્થીનું મોત હાર્ટ એટેકનાં કારણે થયું હોવાની શંકા વ્યક્ત કરવામાં આવી રહી છે. ત્યારે દિકરાનાં મોતનાં સમાચાર સાંભળતા જ પરિવારજનોમાં શોકનું મોજું ફરી વળ્યું હતું.
મુદિત ઢળી પડતા ક્લાસનાં શિક્ષક દ્વારા મુદિતને CPR ની બેઝિક ટ્રીટમેન્ટ પણ આપવામાં આવી
મુદિત ધો. 12 કોમર્સમાં અભ્યાસ કરતો હતો. ત્યારે આજે સ્કૂલમાં એકમ કસોટી હતી. મુદિતને એક બે દિવસથી માત્ર શરદી ખાંસીની તકલીફ હતી. પાંચ પિરિયડ પૂર્ણ થયા બાદ રિસેસમાં તે પરીક્ષા આપવા ક્લાસમાં બેઠો હતો તે સમય દરમ્યાન અચાનક જ તે ઢળી પડ્યો હતો. જે બાદ સ્કૂલનાં ક્લાસ ટીચર દ્વારા મુદિતને CPR જેવી બેઝિક ટ્રીટમેન્ટ પણ આપવામાં આવી હતી. ત્યારે 108 આવતા તુરંત જ મુદિતને 108 મારફતે સારવાર અર્થે ખસેડવામાં આવ્યો હતો.
મને ક્યાં ખબર હતી કે હું જ્યાં ફરજ બજાવું ત્યાં દીકરાનો મૃતદેહ આવશેઃ મુદિતનાં પિતા
સિવિલ હોસ્પિટલમાં સિક્યોરિટી ગાર્ડમાં ફરજ બજાવતા મુદિતનાં પિતા અક્ષયભાઈએ જણાવ્યું હતું કે ક્યાં ખબર હતી કે તે જ્યાં ફરજ બજાવે છે ત્યાં જ એમનાં દીકરાનો મૃતદેહ આવશે. તેમજ મુદિતનાં પિતાએ વધુમાં જણાવ્યું હતું કે, મુદિતને કોઈ તકલીફ ન હતી. તેને માત્ર શરદીની એલર્જી હતી. પણ ભગવાનની આગળ આપણું શું ચાલે?
