- યુવક-યુવતીનો વીડિયો વાયરલ
- યુવકને માર માર્યાનો વીડિયો વાયરલ
- યુવતીની મિત્રતા બદલ યુવકને માર
Ahmedabad Viral Video News: વડોદરા બાદ અમદાવાદમાં પણ યુવતી સાથે મિત્રતા બદલ યુવકને માર મારવામાં આવ્યો હોવાનું સામે આવ્યું છે. અમદાવાદમાં યુવક-યુવતીનો વીડિયો વાયરલ થયો છે. વીડિયોમાં કેટલાક શખ્સો યુવકને માર મારતા જોવા મળી રહ્યા છે. યુવતી સાથે યુવકની મિત્રતાને લઈને યુવકને માર મારવામાં આવ્યો હોવાની માહિતી મળી રહી છે. વીડિયો અમદાવાદના દાણીલીમડા વિસ્તારનો હોવાની શક્યતા સેવાઈ રહી છે.
કેટલાક શખ્સો યુવકને મારી રહ્યા છે માર
અમદાવાદમાં યુવક અને યુવતીની મિત્રતાને લઈને કેટલાક શખ્સો યુવકને માર માર્યો હતો. જેનો વીડિયો સોશિયલ મીડિયા પર વાયરલ થયો છે. વાયરલ વીડિયોમાં જોઈ શકાય છે કે, કેટલાક શખ્સો યુવકને માર મારી રહ્યા છે. લોકો યુવકને તેનું નામ પૂછીને માર મારી રહ્યા છે. વીડિયોમાં યુવતી બુરખામાં જોવા મળી રહી છે. વીડિયોમાં લોકો યુવતીના પિતાને બોલાવવાની વાત પણ કરી રહ્યા છે.
વીડિયોના આધારે પોલીસે હાથ ધરી તપાસ
વીડિયો વાયરલ થયા બાદ તે પોલીસ સુધી પહોંચ્યો છે. હાલ પોલીસે વાયરલ વીડિયોના આધારે તપાસ શરુ કરી છે. વાયરલ વીડિયો અમદાવાદના દાણીલીમડા વિસ્તારનો હોવાનું કહેવામાં આવી રહ્યું છે. જોકે, VTV ન્યૂઝ આ વાયરલ વીડિયોની પુષ્ટિ કરતું નથી. આપને જણાવી દઈએ કે, આવો જ બનાવ વડોદરાથી સામે આવ્યો હતો. જેમાં શહેરના અકોટા વિસ્તારમાં એક આઈસક્રીમની દુકાનમાં બે માસ અગાઉ યુવક-યુવતી બેઠા હતા. આ સમયે કેટલાક યુવકો તેમની પાસે આવ્યા હતા અને ડાયરેક્ટ યુવકનો કોલર પકડી લીધો હતો. ત્યારબાદ આ તમામે યુવકને તેનું નામ અને સરનામું પૂછ્યું હતું. આ સમગ્ર ઘટનાનો વીડિયો પણ તેઓએ બનાવ્યો હતો. જે બાદ તેઓએ યુવક-યુવતીને બ્લેકમેઇલ કરવાનું શરૂ કર્યું હતું અને વીડિયો વાયરલ કરી દીધો હતો.
ગોત્રી પોલીસે હાથ ધરી હતી તપાસ
વીડિયો મામલે ગોત્રી પોલીસે ગુનો દાખલ કર્યો હતો. કોમી વૈમનસ્ય ફેલાય તેવો વીડિયો વાયરલ કરવા મામલે ગોત્રી પોલીસે તપાસનો ધમધમાટ શરૂ કર્યો હતો. પોલીસે ફતેપુરા વિસ્તારના મુસ્તકીન ઈમ્તિયાઝ શેખ, પાણીગેટ વિસ્તારના બુરાનવાલા નજુમિયા સૈયદ અને રાજમહેલ રોડ વિસ્તારના સાહિલ સહાબુદ્દીન શેખ નામના ત્રણ યુવકોને ઝડપી લીધા છે. હાલ ગોત્રી પોલીસે આ મામલે વધુ તપાસ હાથ ધરી છે.
આરોપીઓના નામ
- મુસ્તકીન ઈમ્તિયાઝ શેખ - ફતેપુરા
- બુરાનવાલા નજુમિયા સૈયદ - પાણીગેટ
- સાહિલ સહાબુદ્દીન શેખ - રાજમહેલ રોડ
