લો બોલો ! / ટાર્ગેટ પુરો ન થવા પર અહીં ખાવા પડે છે કાચા ઈંડા, આ કંપની આપી રહી છે કર્મચારીઓને વિચિત્ર સજા

• ચીનમાં કંપની કર્મચારીઓને આપે છે વિચિત્ર સજા 
• ટાર્ગેટ પુરો ન થવા પર ખાવા પડે છે કાચા ઈંડા 
• સોશિયલ મીડિયા પર ઈન્ટર્ને કર્યો ખુલાસો 

દુનિયાના દરેક દેશમાં નોકરીને લઈને કર્મચારીઓમાં સ્ટ્રેસ જોવા મળે છે. ઘણી જગ્યાએ વર્કિંગ કલ્ચરને લઈને પણ વિચિત્ર નિયમો છે. ત્યાં જ ચીન એક એવો દેશ છે જ્યાં જોબ અને વર્કિંગ કલ્ચરના ખૂબ જ કડક નિયમો છે અને જો ટાર્ગેટ પૂરો ન થાય તો કર્મચારીઓને સજા આપવામાં આવે છે. હાલમાં જ ચીનની એક કંપનીએ કર્મચારીઓને ખૂબ જ અજીબોગરીબ સજા આપી છે. જેની ચર્ચા આખી દુનિયામાં થઈ રહી છે.

કર્મચારીઓ માટે વિચિત્ર નિયમ
સોશિયલ મીડિયા પર પોતાનું દર્દ વ્યક્ત કરતાં ચીનની ઝેંગઝોઉ ટેક કંપનીના એક ઈન્ટર્નએ કહ્યું કે અહીં ખરાબ પ્રદર્શનને કારણે કર્મચારીઓને કાચા ઈંડા ખાવા પર મજબૂર કરવામાં આવે છે. ઈન્ટર્નએ સોશિયલ મીડિયા પર લખ્યું કે, કંપનીમાં કર્મચારીઓ માટે ખૂબ જ વિચિત્ર નિયમો છે, જો કોઈ કર્મચારી સમયસર પોતાનો ટાર્ગેટ પૂરો નથી કરી શકતો તો કંપની તેને કાચા ઈંડા ખાવાની સજા આપે છે.

કાચા ઈંડા ખાવાથી ઘણા કર્મચારીઓની તબિયત લથડી
ઈન્ટર્નએ વધુમાં જણાવ્યું કે જ્યારે તેણે આવું કરવાનો ઈન્કાર કર્યો ત્યારે મેનેજમેન્ટ ગુસ્સે થઈ ગયું અને તેને ઈન્ટર્નશિપ પુરી કરવા માટે મજબૂર કર્યો. ઈન્ટર્નએ એમ પણ જણાવ્યું કે જે કર્મચારીઓને કાચા ઈંડા ખાવા માટે મજબૂર કરવામાં આવે છે તેઓને ઉલ્ટી પણ થાય છે પરંતુ મેનેજમેન્ટને તેની બિલકુલ પરવાહ નથી. જો કોઈ આ અંગે પ્રશ્ન ઉઠાવે છે તો HR સીધું જ કહે છે કે કયો કાયદમાં કાચા ઈંડા ખાવા પર પ્રતિબંધ છે?

સોશિયલ મીડિયા પર થઈ રહી છે કંપનીની ટીકા
ત્યાં જ ચીની કંપની દ્વારા કર્મચારીઓને કાચા ઇંડા ખાવાની આ સજાને લઈને સોશિયલ મીડિયા પર ઘણી ટીકાઓ પણ શરૂ થઈ ગઈ છે. ઘણા યુઝર્સ કહે છે કે આ બિલકુલ યોગ્ય નથી અને તે સંપૂર્ણપણે અમાનવીય છે. કાચા ઈંડા ખાવાથી શરીરને અનેક નુકસાન થાય છે. 

મામલો પ્રકાશમાં આવ્યા બાદ જિનશુઈ જિલ્લાના લેબર ઈન્સ્પેક્શન બ્રિગેડે તપાસ શરૂ કરી છે. જો કે કંપનીના મેનેજમેન્ટનું કહેવું છે કે સેલ્સ પ્રોસેસ માટે કર્મચારી જવાબદાર છે, આવી સ્થિતિમાં જો તેને ઈનામ મળે છે તો તેને સજા પણ ભોગવવી પડશે.