- શુભમન ગીલ બન્યો ભારતનો બીજો ક્રિકેટ કિંગ
- ODI બેટર રેન્કીંગમાં 4થું સ્થાન મળ્યું
- ટોપ-10માં કોહલી અને રોહિતનું સ્થાન મળ્યું
- કોહલી સાતમા સ્થાને, રોહિત આઠમા સ્થાને
ઈન્ડિયન પ્રીમિયર લીગની વચ્ચે ટીમ ઈન્ડિયાના ઓપનર શુભમન ગિલ બુધવારે જાહેર થયેલા તાજેતરના આઇસીસી વન-ડે પ્લેયર રેન્કિંગમાં બેટ્સમેનોની યાદીમાં કારકિર્દીના શ્રેષ્ઠ ચોથા સ્થાને પહોંચી ગયો છે. ટોપ 10માં શુભમન ગિલ ઉપરાંત વિરાટ કોહલી અને રોહિત શર્મા પણ સામેલ છે. વિરાટ કોહલી પણ એક સ્થાનના સુધારા સાથે સાતમા સ્થાને પહોંચી ગયો છે, જ્યારે રોહિત શર્મા બેટ્સમેનોના રેન્કિંગમાં આઠમા સ્થાને યથાવત્ છે.
બાબર આઝમ ટોચ પર
પાકિસ્તાનનો કેપ્ટન બાબર આઝમ ટોચ પર છે. બોલરોની વાત કરીએ તો, ફાસ્ટ બોલર મોહમ્મદ સિરાજ ટોપ 10માં યથાવત છે, તે આ યાદીમાં એકમાત્ર ભારતીય બોલર છે. તે ઓસ્ટ્રેલિયાના ફાસ્ટ બોલર જોશ હેઝલવુડ અને ન્યૂઝીલેન્ડના ટ્રેન્ટ બોલ્ટ બાદ ત્રીજા નંબર પર યથાવત છે.
એડેન માર્કરામને ફાયદો થયો
સાઉથ આફ્રિકાનો એડીન માર્કરામ બેટિંગ લિસ્ટમાં 13 સ્થાનના ફાયદા સાથે 41માં સ્થાને પહોંચી ગયો છે અને ઓલરાઉન્ડર્સની યાદીમાં 16 સ્થાનના સુધારા સાથે 32મા ક્રમે પહોંચી ગયો છે. સાઉથ આફ્રિકાએ જોહનીસબર્ગમાં રમાયેલી ત્રણ મેચની શ્રેણીમાં નેધરલેન્ડને 2-0થી હરાવ્યું હતુ. ન્યૂઝીલેન્ડના હેનરી નિકોલ્સ બે સ્થાનના સુધારા સાથે બેટિંગ લિસ્ટમાં 69માં સ્થાને પહોંચી ગયો છે.
સૂર્યકુમાર યાદવે ટોચનું સ્થાન જાળવી રાખ્યું
ટી-20 રેન્કિંગમાં સૂર્યકુમાર યાદવે પણ બેટીંગની યાદીમાં ટોચનું સ્થાન જાળવી રાખ્યું છે, જ્યારે હાર્દિક પંડયા ઓલરાઉન્ડર્સની યાદીમાં બીજા ક્રમે યથાવત્ છે. બાંગ્લાદેશનો લિટ્ટન દાસ એક સ્થાનના સુધારા સાથે 21માં ક્રમે આવી ગયો છે, જે તેની કારકિર્દીની શ્રેષ્ઠ રેન્કિંગ છે. બોલિંગ લિસ્ટમાં માહિષ તિક્શાનાને ત્રણ સ્થાનનો ફાયદો થતાં તે 10માં સ્થાને પહોંચી ગયો છે, જ્યારે બાંગ્લાદેશનો તસ્કીન અહેમદ ત્રણ સ્થાનના ફાયદા સાથે 36મા સ્થાને પહોંચી ગયો છે.
કયા કયા રેકોર્ડ કર્યાં શુભમન ગીલે
(1) વનડેમાં સૌથી ઝડપી 1000 રન બનાવનાર પહેલો ભારતીય બેટ્સમેન
(2) વનડેમાં 2000 રન બનાવનાર સૌથી નાની ઉંમરના ખેલાડી
(3) ન્યૂઝીલેન્ડ સામેની વનડેમાં સૌથી વધારે વ્યક્તિગત સ્કોર બનાવનાર ખેલાડી
(4) વિરાટ કોહલીનો સૌથી ઝડપી રન બનાવવાનો રેકોર્ડ તોડ્યો હતો.
