- જળાશયોની સ્થિતી પર સરકારની નજર
- વરસાદ ખેંચાતા અનેક જળાશયો ખાલી
- ખેડૂતોના પાક નિષ્ફળ જવાની ભીતિ
- રાજ્યમાં 42 ડેમમાં 50% કરતા ઓછું પાણી
મેઘરાજા રિસાયા હોય તેમ રાજ્યમાં ઓગસ્ટ મહિનામાં બિલકુલ વરસાદ પડ્યો ન હતો. જેથી જગતનો તાત એવો ખેડૂત ચિંતીત બન્યો છે. ત્યારે ખેડૂતો દ્વારા બજારમાંથી મોંઘા ભાવે બિયારણ ખરીદી કરી ખેતરમાં પાકની વાવણી કરી છે. ત્યારે હવે રાજ્યનાં 42 જેટલા જળાશયોમાં પણ હવે 50 ટકા કરતા ઓછું પાણી છે. તેમજ રાજ્યની જીવાદોરી સમાન સરદાર સરોવર ડેમમાં 80.97 ટકા જળ સંગ્રહ છે. તેમજ કચ્છનો ટપ્પર ડેમ, અરવલ્લીનો મેશ્વો ડેમમાં 50 ટકા કરતા ઓછો જળસંગ્રહ છે. જ્યારે સાબરકાંઠાનો હાથમતી ડેમ, મોરબીનાં બ્રહ્માણી ડેમમાં પણ 50 ટકા કરતા ઓછો જળસંગ્રહ છે.
બિપોરજોય વાવાઝોડાએ સમગ્ર ચોમાસાની પેટર્નને ખોરવી નાંખી
રાજ્યમાં બિપોરજોય વાવઝોડાએ સમગ્ર ચોમાસાની પેટર્નને ખોરવી નાંખી છે. ત્યારે બિપોરજોય વાવાઝોડાનાં કારણે કચ્છ તેમજ સૌરાષ્ટ્રમાં પુરની પરિસ્થિતિ સર્જાઈ હતી. તો ઓગસ્ટ મહિનામાં મેઘ મહેર ન થતા ધરતીનો તાત એવો ખેડૂત ચિંતીત બન્યો છે. ખેતી પર આધારીત એવા ઉત્તર ગુજરાતમાં વરસાદ ન પડવાથી પાણીની તંગી સર્જાય છે. સરહદી વિસ્તાર એવા બનાસકાંઠા જીલ્લાનાં ગામડાઓમાં પાણી માટે લોકોએ રઝળપાટ કરવી પડે છે. ત્યારે ખેડૂતો દ્વારા સરકાર પાસે 10 કલાક વીજળી આપો અથવા તો કેનાલ મારફતે પાણી આપવાની માંગણી કરી છે.
સુજલામ સુફલામ યોજનાની કેનાલમાં પાણી છોડવા પત્ર લખી કરી રજૂઆત
ઓગસ્ટ મહિનામાં વરસાદ ખેંચાતા દૂધસાગર ડેરીનાં ચેરમેન અશોક ચૌધરીએ મહેસાણા જીલ્લા વિસ્તારમાં પાણી છોડવા મુખ્યમંત્રીને પત્ર લખ્યો હતો. જેમાં સુજલામ સુફલામ યોજનાની કેનાલ મારફતે કેનાલમાં પાણી છોડવા અશોક ચૌધરીએ પત્ર લખી રજૂઆત કરી હતી. તેમજ વધુમાં તેઓએ પત્રમાં લખ્યું હતું કે જીલ્લામાં અપૂરતા વરસાદને લઈ ખેતરમાં ઉભા પાક સામે વિકટ સ્થિતિ ઉભી થઈ છે. ત્યારે તાત્કાલિક પાણી નહિ છોડવામાં આવે તો પાક સામે ગંભીર સ્થિતિ ઉભી થશે.
