- તાપીની સ્પે. પોસ્કો કોર્ટે 2 શખ્સોને સજા ફટકારી
- અમરેલીમાં સ્પેશિયલ પોક્સો કોર્ટે દુષ્કર્મીને સજા ફટકારી
- સુરતમાં દુષ્કર્મ-હત્યાનો કેસમાં ફાંસીની સજા
ચોરી... લૂંટફાટ... બળાત્કાર... અને હત્યાના કિસ્સા ગુજરાતમાં ખુબ વધી રહ્યા છે. તેમાં પણ નાની બાળકીઓના દુષ્કર્મના કિસ્સાઓ પણ વધ્યા છે ત્યારે આજે ગુજરાતમાં ત્રણ દુષ્કર્મના કેસમાં ઐતિહાસિક સજા ફટકારવામાં આવી છે.
તાપી જિલ્લાની સ્પેશિયલ પોસ્કો કોર્ટે 2 આરોપીને 20 વર્ષની સજા ફટકારી
તાપી જિલ્લાની સ્પેશિયલ પોસ્કો કોર્ટે 2 શખ્સોને આકરી સજા ફટકારી છે. 2 અલગ અલગ ગુનાના પોસ્કો કેસમાં કોર્ટે હુકમ કર્યો છે. આ બંને ગુના વ્યારા પોલીસ સ્ટેશનમાં નોંધાયા હતાં. આ બંને આરોપીઓએ સગીરાનું અપહરણ કર્યા બાદ દુષ્કર્મ આચર્યું હોવાનો આરોપી છે. આથી સ્પેશિયલ પોસ્કો કોર્ટે વિકી ગામીત અને અંકિત ચૌધરી નામના આરોપીને 20 વર્ષની સજા ફટકારી છે. બન્ને આરોપીને 20 વર્ષની સજા અને 3 લાખ 10 હજારનો દંડ પણ ફટકાર્યો છે.
અમરેલીમાં દુષ્કર્મ કેસમાં આરોપીને 20 વર્ષની સજા ફટકારાઈ
અમરેલીમાં બળાત્કાર કેસમાં સ્પેશિયલ પોક્સો કોર્ટે આરોપીને 20 વર્ષની સજા ફટકારી છે. તો સાથે 12 હજારનો દંડ અને વળતર ચૂકવવાનો હુકમ પણ કર્યો છે. અમરેલી અજમેરા શાળા પાસે 13-3-19ના રોજ સગીરાને લગ્નની લાલચ આપીને અપહરણ કરી દુષ્કર્મ આચર્યાની અજાણ્યા શખ્સ વિરૂદ્ધ ફરિયાદ નોંધાઇ હતી. પોલીસે મોટા ગોરખવાળા ગામના સંજય ઉર્ફે સુધીર પ્રવિણભાઇ બગડાને ઝડપી લીધો હતો. ત્યારે આજે કોર્ટે આરોપીને સજા સંભળાવી છે.
સુરત દુષ્કર્મ અને હત્યાનો કેસમાં આરોપી ગુડ્ડુ યાદવને ફાંસીની સજા
સુરત માં દિવાળીના દિવસે બાળકીનું અપહરણ કર્યા બાદ બાળકી સાથે દુષ્કર્મ આચરીને તેણીની હત્યા કરી ગદેવામાં આવી હતી. આ કેસમાં માત્ર 28 દિવસમાં ચુકાદો આવી ગયો અને આરોપી ગુડ્ડુ યાદવને ફાંસીની સજા ફટકારવામાં આવી છે. આરોપીને સજા મળ્યા બાદ બાળકીના પિતાની પ્રતિક્રિયા સામે આવી હતી. બાળકીના પિતાને જલ્દીથી ન્યાય મળ્યાની ખુશી થઇ છે. પિતાને પણ આટલો જલ્દી ન્યાય મળશે એવી આશા ન હતી. સરકારી વકીલ દ્વારા પણ તેમને ભરોસો આપવામાં આવ્યો હતો. હવે પિતા માત્ર આરોપી ગુડ્ડુ યાદવની ફાંસીની તારીખ નક્કી કરાવવા માટે તૈયારી કરશે.
સાંતેજ વિસ્તારમાં બાળકીઓ સાથે દુષ્કર્મ કેસના આરોપીને આજીવન કેદની સજા (1-12-2021)
થોડા દિવસ અગાઉ ગાંધીનગરના સાતેજમાં બાળકીઓ સાથે દુષ્કર્મ કેસમાં આરોપીને આજીવન કેદની સજા ફટકારીને ઐતિહાસિક ચુકાદો આપ્યો હતો. ગાંધીનગર સેશન્સ કોર્ટે આરોપી વિજય ઠાકોરને આજીવન કેદની સજા ફટકારી હતી. આપને જણાવી દઈએ કે, સાંતેજની બાળકી સાથે દુષ્કર્મ કેસમાં CCTVના આધારે પોલીસે આરોપીની ધરપકડ કરી હતી. જે દરમિયાન આરોપીએ પોલીસ સમક્ષ પણ ગુનો કબૂલ્યો હતો. આરોપીએ કુલ 3 બાળકીઓ સાથે દુષ્કર્મ કર્યું હોવાનું અને એક બાળકીની હત્યા કરી હોવાનું કબૂલ્યું હતું. આરોપી વિજય ઠાકોર શ્રમજીવીઓની બાળકીઓને જ ફસાવતો હતો.
