ચોમાસું / મહિસાગરમાં ધોધમાર વરસાદ, કડાણા ડેમની જળસપાટીમાં વાધારો

ઉપરવાસમાં ભારે વરસાદના કારણે સતત પાણીની આવક થતા ડેમની જળસપાટીમાં વધારો થતા ડેમના 3 ગેટને 5 ફૂટ સુધી ખોલવામાં આવ્યા છે. 3 ગેટમાંથી મહીસાગર નદીમાં 41 હજાર 820 ક્યુસેક પાણી છોડવામાં આવી રહ્યું છે. જ્યારે 67 હજાર 898 ક્યુસેક પાણીની આવકના કારણે જળસપાટી 416.8 ફૂટે પહોંચી છે. અને કડાણા ડેમની ભયજનક સપાટી 419 ફૂટ છે. જેને લઇ માહિ નદીના કાઠાં વિસ્તારોને એલર્ટ કરાયાં છે. તો નદીના આસપાસના 25 કુટંબોનુ સ્થળાંતર કરવામાં આવ્યું છે.

વડોદરા, પાદરા અને ડેસર તાલુકાના ગામોને એલર્ટ રહેવા માટે આદેશ આપવામાં આવ્યો છે. પાદરાના ડબકા, મહેમદપુરા, પાવડી, તિથોર ગામને એલર્ટ કરાયાં છે. વડોદરાના અનગઢ, શેરખી, સિન્ધરોટ ગામને એલર્ટ કરાયાં છે. જ્યારે નંદેશરી, કોટણા, ફાજલપુર, રાયકા, દોડકા ગામોને સાવચેત કરવામાં આવ્યા છે.

બંગાળની ખાડીની લો પ્રેશર સિસ્ટમને લઇને બુધવાર સાંજ બાદ વરસાદી માહોલ બંધાયો હતો. જે અંતર્ગત મોડી રાતથી ધીમે ધીમે સાર્વત્રિક વરસાદની શરૂઆત થઇ હતી. ગુરૂવાર આખો દિવસ સાર્વત્રિક વરસાદની સ્થિતિ યથાવત રહી હતી. જે શુક્રવાર બપોર સુધી જોવા મળી હતી. ત્યાર બાદ ધીમેધીમે વાદળો વિખરાયા હતા. 
 

જ્યારે હવામાન વિભાગ દ્વારા જણાવવામાં આવ્યું છે કે, ગુજરાત પરથી ભારે વરસાદનું સંકટ હટ્યુ છે. દિવસભર રાજ્યના તમામ જિલ્લાઓમાં છૂટોછવાયો વરસાદ રહેશે. જ્યારે દરિયાકાંઠાના તમામ જિલ્લાઓમાં સામાન્ય વરસાદ થશે. તો કચ્છ, સૌરાષ્ટ્ર અને દક્ષિણ ગુજરાતમાં છૂટોછવાયો વરસાદ રહેશે. જ્યારે ઉત્તરગુજરાતમાં પણ દિવસભર વરસાદી માહોલ યથાવત રહેશે.