- ગુજકેટ ૨૦૨૩ની પરીક્ષાની હોલ ટીકીટ જાહેર
- ગુજકેટ પરીક્ષાની હોલ ટીકીટ ડાઉનલોડ કરવા સૂચન
- ટીકીટ ફક્ત ઓનલાઈન માધ્યમથી જ મુકાઈ
ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ - ગાંધીનગર દ્વારા ડીગ્રી એન્જીનીયરીંગ, ડીગ્રી/ડીપ્લોમાં ફાર્મસી અભ્યાસક્રમોમાં પ્રવેશ મેળવવા માંગતા A, B, અને ABગ્રુપના HSC વિજ્ઞાન પ્રવાહના ઉમેદવારો માટે ગુજરાત કોમન એન્ટ્રન્સ ટેસ્ટ લેવામાં આવે છે. જે તા.૦૩/૦૪ સોમવારના રોજ યોજાશે. ત્યારે ગુજરાત કોમન એન્ટ્રન્સ ટેસ્ટ (ગુજકેટ) ૨૦૨૩ની-પરીક્ષાની હોલ ટીકીટ ફક્ત ઓનલાઈન માધ્યમથી મૂકવામાં આવે છે. જેને લઈને ગુજકેટ-૨૦૨૩ ની પરીક્ષાના તમામ ઉમેદવારોએ વાલીઓ તથા ઉચ્ચતર માધ્યમિક શાળાના આચાર્યોએ નોંધ લેવા જણાવ્યું છે.
ગુજકેટ-૨૦૨૩ ની પરીક્ષા આપવા ઈચ્છુક ઉમેદવારોએ હોલ ટીકીટ બોર્ડની વેબસાઈટ gujcet.gsebht.in અથવા gsebht.in અથવા www.gseb.org પરથી ડાઉનલોડ કરી લેવા જણાવ્યું છે. જેમાં ઉમેદવારોએ ગુજકેટ-૨૦૨૩ માટે ભરેલ આવેદનપત્રમાં નોંધાયેલ મોબાઈલ નંબર અથવા ઈ-મેઈલ આઈ.ડી અને જન્મ તારીખ અથવા એપ્લીકેશન નંબર દાખલ કરી ટિકીટ ડાઉનલોડ કરી શકાશે. આ દરમિયાન ઉમેદવારો પોતાના નામ પરથી પણ એડમિશન કાર્ડ,પ્રવેશિકા સર્ચ કરી, જન્મ તારીખની વિગત ભરીને પણ ડાઉનલોડ કરી શકાશે.
ટીકીટ ઓનલાઈન માધ્યમથી જ મળશે
આ ઉપરાંત ગુજરાત માધ્યમિક અને ઉચ્ચતર માધ્યમિક શિક્ષણ બોર્ડ ખાતે નોંધાયેલ રાજ્યની વિજ્ઞાન પ્રવાહની તમામ ઉચ્ચત્તર માધ્યમિક શાળાઓ પોતાના ઈન્ડેક્ષ નંબર તથા રજીસ્ટર્ડ મોબાઈલ નંબર નો ઉપયોગ કરી લોગ-ઈન થઈ પોતાની શાળાના ગુજકેટ-૨૦૨૩ માટેના ઉમેદવારો ટીકીટ ડાઉનલોડ કરીને તમામ વિદ્યાર્થીઓને વિતરણ કરી શકશે.ટીકીટ માત્રને માત્ર ઓનલાઈન માધ્યમથી જ મળશે, જે પરીક્ષાખંડમાં પ્રવેશ માટે માન્ય રહેશે. આ હોલટિકિટ પર શાળાના આચાર્યના સહી સિક્કો કરાવવાની જરૂર નથી જે ધ્યાને લેશો.
ઉમેદવારો માટે ખાસ નોંધ
ગુજકેટ-૨૦૨૩ પરીક્ષાના ઉમેદવારોએ પરીક્ષા દરમિયાન હોલ ટીકીટ સાથે કોઈ પણ એક ફોટો આઈ.ડી પ્રુફ (આધાર કાર્ડ અથવા ડ્રાઈવીંગ લાયસન્સ અથવા ધોરણ-૧૨ની પરીક્ષાની હોલટિકિટ) સાથે લઈ જવાનું રહેશે, આ અંગે નોંધ લેવા ગુજરાત માધ્યમિક અને ઉચ્ચતર માધ્યમિક શિક્ષણ બોર્ડના નાયબ નિયામક (પરીક્ષા બી.એમ સોલંકી દ્વારા જણાવાયું છે.
3 એપ્રિલે યોજાશે પરીક્ષા
ગુજકેટની પરીક્ષાની તારીખ 3 એપ્રિલ 2023 જાહેર કરવામાં આવી છે. ગુજકેટની પરીક્ષા 3 એપ્રિલ 2023ને સોમવારના રોજ 10:00 વાગ્યે જિલ્લા કક્ષાના કેન્દ્રો ખાતે યોજાશે. રાજ્યના એક લાખ કરતા પણ વધારે વિદ્યાર્થીઓ પરીક્ષા આપશે. આ પરીક્ષામાં ગુજરાતી, હિન્દી અને અંગ્રેજી એમ ત્રણ ભાષામાં પ્રશ્નપત્ર રહેશે.
1.30 લાખ વિદ્યાર્થીઓ આપશે પરીક્ષા
વિગતવાર વાત કરીએ રાજ્યભરમાંથી 1.30 લાખ વિદ્યાર્થીઓ આ પરીક્ષા આપશે. જેમાં ગુજરાતી માધ્યમના 83 હજાર વિદ્યાર્થીઓ પરીક્ષા આપશે. જ્યારે અંગ્રેજી માધ્યમના 50 હજાર વિદ્યાર્થીઓ આ પરીક્ષા આપશે. વિદેશથી પણ વિદ્યાર્થીઓએ પરીક્ષા માટે રજિસ્ટ્રેશન કરાવ્યું છે. 626 બિલ્ડિંગના 6 હજાર 598 વર્ગખંડમાં પરીક્ષા લેવાશે.
