- સરકારી ગોડાઉનમાંથી થતા અનાજ કૌભાંડને પગલે બેઠક
- અન્ન નાગરિક પુરવઠામંત્રી કુંવરજી બાવળિયાએ યોજી બેઠક
- જિલ્લા પુરવઠા અધિકારીઓને જવાબદારો સામે પગલા લેવા અપાઈ સૂચના
રાજ્યમાં સરકારી ગોડાઉનમાંથી અનાજ સગેવગે થવાના કિસ્સાઓ છાશવારે સામે આવી રહ્યા છે ત્યારે આ મામલે સરકારનો પુરવઠા વિભાગ પણ સતર્ક બન્યો છે. જેને લઈને આજે રાજ્યના અન્ન નાગરિક પુરવઠામંત્રી કુંવરજી બાવળિયાએ તાકીદે બેઠક યોજી હતી. ગેરરીતિને લઈને મંત્રી બાવળિયાએ જિલ્લા પુરવઠા અધિકારીઓ સાથે બેઠક યોજી હતી. જેમાં આ બાબતને ગંભીર ગણાવી અધિકારીઓ સાથે બેઠક કરી કડક સૂચનાઓ અપાઈ હતી. તો જિલ્લા પુરવઠા અધિકારીઓને જવાબદારો સામે પગલા લેવા પણ તાકીદ કરવામાં આવી હતી.
પૂરવઠા વિભાગના ગોડાઉન પર સીસીટીવી કેમેરા લગાવવાનું કાર્ય પ્રગતિમાં
ઉલ્લેખનિય છે કે અન્ન નાગરિક પુરવઠામંત્રી કુંવરજી બાવળિયાએ અધિકારીઓ સાથે બેઠક કરી અનાજમાં થતી ગેરરીતિ રોકવા 100 કરોડના ખર્ચે તમામ પુરવઠા વિભાગના ગોડાઉન પર સીસીટીવી કેમેરા લગાવવાનું કાર્ય પ્રગતિમાં હોવાનો ઉલ્લેખ કર્યો હતો. જે ટૂંક સમયમાં પૂર્ણ થશે જેનું સીધુ મોનિટરીંગ ગાંધીનગર ખાતેથી કરવામાં આવશે. ગાંધીનગર પુરવઠા કચેરીમાં સૌથી મોટી સ્ક્રીન મુકાઈ હોવાનું ઉપરાંત જિલ્લા પુરવઠા અધિકારી દ્વારા પણ મોનીટરીંગ કરશે. તે અંગે વિગતો આપી હતી.
પોરબંદરના રાણાવાવમાં અનાજ કૌભાંડ
ઉલ્લેખનીય છે કે પોરબંદરના રાણાવાવમાંથી અનાજનું મસમોટું કૌભાંડ બહાર આવ્યું છે. જેમાં રાણાવાવના સસ્તા અનાજના ગોડાઉનમાંથી અનાજના મસમોટા જથ્થાની ઘટ સામે આવતા ઉચ્ચ અધિકારીઓ ઘટનાસ્થળે દોડી આવ્યા છે અને તપાસ શરૂ કરી હતી. આ દરમિયાન રાણાવાવ સરકારી ગોડાઉન ખાતેથી ઘઉં, ચોખા અને ખાંડના મોટા જથ્થાનો હિસાબ મળતો ન હતો. એટલું જ નહીં ઓડિટ દરમિયાન ગોડાઉનમાંથી ઘઉંના 7000 કટ્ટા, ચોખા અને ખાંડના 22 કટ્ટાનો હિસાબ ન મળતા અંદાજે 1 કરોડ રૂપિયાનું કૌભાંડ થયાનું સામે આવ્યું છે.
થોડા દિવસો અગાઉ વડોદરામાંથી બહાર આવ્યું હતું અનાજ કૌભાંડ
બીજી બાજુ તાજેતરમાં વડોદરામાંથી અનાજ કૌભાંડ બહાર આવ્યું હતું જે સમગ્ર કૌભાંડ આધાર અને ફિંગર પ્રિન્ટ વ્યવસ્થાના કારણે બહાર આવ્યું હતું. એક જ કાર્ડધારકના નામે અન્ય દુકાનમાંથી પણ પુરવઠો લેવાયાની આશંકા સામે આવી હતી. આથી થમ્બ ડિવાઈસ અને લેપટોપના અલગ અલગ દુકાનમાં ઉપયોગ થયો હોવાની આશંકા સેવાઈ હતી. કૌભાંડ બહાર આવ્યા બાદ રાજ્ય સરકારે સસ્તા અનાજની 12 દુકાનોમાં તપાસ કરવાનો આદેશ આપ્યો હતો.
