વડોદરા / ડભોઇ રોડ પરના ગોડાઉનમાં ભભૂકી વિકરાળ આગ, લાખો રૂપિયાનો માલ-સામાન બળીને ખાક

• વડોદરા ડભોઇ રોડ વિસ્તારમાં લાગી આગ
• ડોલ્ફિન એસ્ટેટ R.O કંપનીના ગોડાઉનમાં આગ ભભૂકી
• અચાનક આગ લાગતા વિસ્તારમાં નાશભાગ મચી

વડોદરાના ડભોઇ રોડ વિસ્તારમાં આગની ઘટના સામે આવતા અફરાતફરી મચી જવા પામી હતી. ડભોઇ રોડ વિસ્તારમાં ડોલ્ફિન એસ્ટેટ RO કંપનીના ગોડાઉનમાં લાગી આગ ફાટી નીકળી હતી.  આગને કાબૂમાં લેવા ફાયરબ્રિગેડના જવાનોએ જબરી જહેમત ઉઠાવી હતી.  આગની આ ઘટનામાં જાનહાનિના કોઈ સમાચાર સામે આવ્યા નથી.

આગ લાગવાનું કારણ  અકબંધ
કોઈ અકળ કારણોસર ગોડાઉનમાં આગની દુર્ઘટના ઘટી હતી. જેને લઇને ક્ષણિક દોડધામ મચી જવા પામી હતી. આ મામલે ફાયર વિભાગને જાણ કરતા 5 ફાયર ફાયટર તાત્કાલિક ઘટનાસ્થળે દોડી આવ્યા હતા અને આગ પર કાબૂ મેળવવા પ્રયાસો હાથ ધર્યા હતા. જો કે આગ કાબૂમાં આવે તે પહેલા ગોડાઉનનો તમામ માલ-સામાન બળીને ખાક થઇ ગયો હતો. આગને કારણે લાખો રૂપિયાના નુકસાનીનો અંદાજ લગાવવામાં આવી રહ્યો છે. ભારે જહેમત બાદ આગ પર કાબુ મેળવાયો હતો. આગનું કોઈ સ્પષ્ટ કારણ સામે ન આવતા પોલીસ તેમજ ફાયર વિભાગે ઝીણવટભરી તપાસ હાથ ધરી છે. 

ગઇકાલે અંબાજીની ધર્મશાળામાં લાગી હતી  ભી ષણ આગ 
દિવાળીના તહેવારોને લઇને લોકો ફટાકડા અને આતશબાજીનો આનંદ માણતા હોવાથી આગની ઘટનાઑમાં ઉછાળો આવ્યો છે. તેવામાં ગઇકાલે અંબાજીની ધર્મશાળામાં ભીષણ આગની ઘટના સામે આવતા અફરાતફરી મચી જવા પામી હતી.જોતજોતામાં આગે વિકરાળ રુપ ધારણ કરી લેતા લાખોનો સામાન આગમાં બળીને ખાખ થઇ ગયો હતો. બીજી બાજુ આ મામલે ફાયર બ્રિગેડ અને પોલીસને જાણ કરતા કાફલો તાત્કાલિક ઘટનાસ્થળે દોડી ગયો હતો અને અવિરત પાણીનો મારો ચલાવી આગ પર કાબૂ મેળવ્યો હતો.