- બિહારમાં રૂ. 500 અને 200 નકલી નોટ બનાવતી ગેંગનો પર્દાફાશ
- બિહાર પબ્લિક સર્વિસ કમિશનની તૈયારી કરી રહેલા વિદ્યાર્થીઓ બન્યા આરોપી
- પોલીસને એપાર્ટમેન્ટમાંથી 1 લાખ 77 હજારની નકલી નોટો મળી
હાલ દેશભરમાં 2000ની નોટનો મુદ્દો છવાયેલો છે. આ દરમિયાન હવે બિહારમાં નકલી નોટ બનાવતી ગેંગનો પર્દાફાશ થયો છે. વાત જાણે એમ છે કે, બિહારની રાજધાની પટનામાં નકલી નોટ બનાવતી ગેંગનો પર્દાફાશ થયો છે. આશ્ચર્યની વાત એ છે કે, બિહાર પબ્લિક સર્વિસ કમિશનની તૈયારી કરી રહેલા વિદ્યાર્થીઓ આ વ્યવસાય સાથે સંકળાયેલા છે.
બિહારની રાજધાની પટનાના શ્રીકૃષ્ણપુરી પોલીસ સ્ટેશન વિસ્તારના આનંદપુરી વિસ્તારની આ ઘટનાની ચકચાર મચી ગઈ છે. અહીં રાજારામ એપાર્ટમેન્ટના એક ફ્લેટમાંથી પોલીસે લાખો રૂપિયાની નકલી નોટો મળી આવી છે. નકલી નોટો સાથે પોલીસને દારૂની અનેક બોટલો પણ મળી આવી હતી. કહેવામાં આવી રહ્યું છે કે, અહીં ગેરકાયદે દારૂનો ધંધો પણ થતો હતો. મળતી માહિતી મુજબ ગુપ્ત માહિતીના આધારે પોલીસે સોમવારે રાજારામ એપાર્ટમેન્ટમાં દરોડો પાડ્યો હતો. તેઓએ નકલી નોટોના ધંધામાં સંડોવાયેલા બે વિદ્યાર્થીઓની ધરપકડ કરી છે.
પોલીસે શું કાર્યવાહી કરી ?
વિગતો મુજબ સ્થાનિક પોલીસને એપાર્ટમેન્ટમાંથી 1 લાખ 77 હજારની નકલી નોટો મળી આવી છે. તમામ નકલી નોટો 500 અને 200ની છે. આ સાથે પોલીસે અહીંથી અડધી છાપેલી નકલી નોટો, પ્રિન્ટર, કેમિકલ અને નકલી નોટના કાગળોના બંડલ પણ જપ્ત કર્યા છે. ધરપકડ કરાયેલા આરોપીઓની ઓળખ નવાદા નિવાસી રત્ના યાદવ અને કટિહાર નિવાસી યાકુબ ખાન તરીકે થઈ છે.
શું કહ્યું પોલીસે ?
પોલીસના જણાવ્યા અનુસાર જ્યારે તેઓ દરોડા માટે એપાર્ટમેન્ટ પહોંચ્યા તો તેમને જોઈને બંને આરોપીઓ એપાર્ટમેન્ટમાંથી નીચે કૂદી પડ્યા. હાઈટ વધુ હોવાના કારણે બંનેને ઘણી ઈજા પણ થઈ હતી. પોલીસે તરત જ તેની ધરપકડ કરી અને તેને હોસ્પિટલ લઈ ગઈ. જેથી તેમની પ્રથમ સારવાર થઈ શકે.
આરોપીઓએ શું કહ્યું ?
આ તરફ BPSCની તૈયારી કરી રહેલા વિદ્યાર્થીઓ પૂછપરછ દરમિયાન પોલીસે જણાવ્યું કે, બંને વિદ્યાર્થી છે અને તેઓ BPSCની તૈયારી કરી રહ્યા છે. હાલ તેની પૂછપરછ ચાલી રહી છે. આ ગેંગમાં અન્ય વિદ્યાર્થીઓ પણ સામેલ છે કે કેમ તેની તપાસ કરવામાં આવી રહી છે.
વૈશાલીમાં નકલી નોટોની ગેંગનો પર્દાફાશ
અગાઉ વૈશાલીમાં નકલી નોટોની ગેંગનો પર્દાફાશ થયો હતો. ગુપ્ત માહિતીના આધારે પોલીસ દરોડો પાડવા પહોંચી હતી અને 6 લોકોની અટકાયત કરી હતી. સ્થળ પરથી નોટો ગણવાનું મશીન અને રૂપિયાના બંડલ મળી આવ્યા હતા. રૂપિયાના બંડલમાં ઉપર અને નીચે અસલી નોટો હતી, પરંતુ બંડલની વચ્ચે નકલી નોટોની સાથે કાગળ પણ રાખવામાં આવ્યો હતો.
