- અહેમદ પટેલના પુત્ર ફૈઝલ પટેલનું વધુ એક ટ્વીટ
- હું જાહેર જીવન કાયમ માટે છોડી દેવાનું વિચારી રહ્યો છું-ફૈઝલ
- મારા વિકલ્પો ખુલ્લા રાખવાનો અર્થ આવો થઈ શકે
એક તરફ ગુજરાત વિધાનસભાની ચૂંટણી નજીક આવી રહી છે તો બીજી તરફ કોંગ્રેસમાં નારાજગી હોવાનું ધીરે ધીરે સપાટી પર આવી રહ્યું છે. ત્યારે ફરી એકવાર
અહેમદ પટેલના પુત્રએ ટ્વિટ કરીને કોંગ્રેસ પ્રત્યે પોતાનું વલણ વધારે સ્પષ્ટ કર્યુ છે.
ફૈઝલ પટેલે કરી સ્પષ્ટતા
ગુજરાત વિધાનસભાની ચૂંટણી પહેલા કોંગ્રેસના દિવગંત નેતાના પુત્ર ફૈઝલ પટેલે હાઇકમાન્ડ પ્રત્યે નારાજગી વ્યક્ત કરતા રાજકારણ ગરમાયુ હતું, ટ્વિટ કર્યુ હતુ તેમાં ઓપ્શન ખુલ્લા હોવાનું પણ જણાવ્યુ હતું જે બાદ એવી પણ અટકળો લગાવવામાં આવી હતી કે તેઓ કોંગ્રેસ છોડીને ભાજપમાં જોડાશે.પરંતુ આજે ફરી એકવાર તેમણે ટ્વિટ કરીને સ્પષ્ટતા કરી છે કે મારા માટે ઓપ્શન ખુલ્લા છે તેનો મતલબ એવો પણ હોઇ શકે છે કે પબ્લિક લાઇફ કાયમ માટે છોડવાનુ વિચારી રહ્યો છું. વધુમાં એમ પણ જણાવ્યું કે કોઇ પણ ઓળખાણ વિના કામ કરીને તથા ગરીબોને મદદ કરીને થાકી ગયો છું.
5 એપ્રિલે નારાજગી કરી હતી વ્યક્ત
કોંગ્રેસના દિવગંત નેતા અહેમદ પટેલના પુત્ર ફૈઝલ પટેલે ટ્વિટ કરીને ખળભળાટ મચાવ્યો હતો.. ફૈઝલ પટેલે ટ્વિટ કરીને કોંગ્રેસથી નારાજગી વ્યક્ત કરી હતી. તેઓએ ટોચની લીડરશિપ સામે નારાજગી દર્શાવી અને સાથે એમ પણ લખ્યુ કે જવાબદારી અંગે રાહ જોઇને હું થાક્યો. આ ઉપરાંત ઉપરી નેતાગીરી તરફથી કોઇ પ્રોત્સાહન પણ ન મળતુ હોવાનો ટ્વિટમાં ઉલ્લેખ કર્યો હતો. સાથે જ તેઓએ અન્ય વિકલ્પ પણ ખુલ્લા હોવાની વાત લખી હતી.
કોંગ્રેસ હાઇકમાન્ડનું તરફથી કોઇ પ્રતિક્રિયા નહી
છેલ્લા બે દિવસથી ફૈઝલ પટેલે દ્વારા કોંગ્રેસ પ્રત્યે ટ્વિટ કરવામાં આવી રહ્યું છે.આજદિન સુધી કોઇ જવાબદારી ન સોંપાતા તેઓએ કોંગ્રેસ પ્રત્યે નારાજગી વ્યક્ત કરી હતી. જોકે આ મામલે હાઇકમાન્ડ તરફથી કોઇ પ્રતિક્રિયા આપવામાં આવી નથી. કે નથી ફૈઝલ પટેલને હાઇકમાન્ડે તેડુ મોકલ્યુ. ત્યારે આવનારા દિવસોમાં જોવુ એ રહેશે કે વિધાનસભાની ચૂંટણીને ધ્યાને રાખીને ફૈઝલ પટેલને કોઇ મહત્વની કામગીરી સોંપવામાં આવશે કે નહી ?
