માઠા સમાચાર / ફરીવાર વધશે તમામ લોનની EMI! RBI ગર્વનરે આપ્યા રેપો રેટ વધારવાના સંકેત

• શું ફરીથી જનતા પર પડશે મોંઘવારીનો માર
• રેપો રેટમાં વધુ એક વધારાની શક્યતા 
• RBI ગર્વનરે આપ્યા રેપો રેટ વધારવાના સંકેત

ફરી એકવાર મોંઘવારી વધવાને કારણે રિઝર્વ બેંક ઓફ ઈન્ડિયાની ચિંતા પણ વધવા લાગી છે. આવી સ્થિતિમાં સામાન્ય માણસને ફરી આંચકો લાગી શકે છે. વાત જાણે એમ છે કે, દેશમાં છૂટક ફુગાવો (CPI) દર ગયા મહિને ફરી વધીને 6.52% થયો હતો. આ કારણે રેપો રેટમાં વધુ એક વધારાની શક્યતા પણ વધી જવાની ધારણા છે. RBI એ પણ સંકેત આપ્યો છે કે, ફુગાવાને લઈને ઘણી અનિશ્ચિતતા છે. જો સેન્ટ્રલ બેંક વધુ એક કડક પગલું ભરશે તો લોનની EMI ફરી વધી જશે.

વધતી જતી મોંઘવારી ચિંતાનું કારણ
સ્પષ્ટ શબ્દોમાં કહીએ તો દેશના લોકોને મોંઘી લોનમાંથી રાહત મળી રહી નથી. રિઝર્વ બેંક ઓફ ઈન્ડિયા (RBI) એ ફેબ્રુઆરીની શરૂઆતમાં બોલાવેલી આ વર્ષની MPCની બેઠક બાદ રેપો રેટમાં 0.25 ટકાનો વધારો કર્યો હતો. જોકે ફુગાવો રિઝર્વ બેંકના દાયરામાં આવી ગયો હતો. પરંતુ હવે ફરી મોંઘવારી દર નિર્ધારિત લક્ષ્યાંકથી ઉપર પહોંચી ગયો છે, ત્યારે ફરી એકવાર આરબીઆઈ દ્વારા વ્યાજદરમાં વધારો કરવાનો નિર્ણય લેવામાં આવે તેવી પૂરી શક્યતા છે.

વૈશ્વિક અનિશ્ચિતતાઓને કારણે મોંઘવારી દરમાં ફરી વધારો થવાથી RBIની ચિંતા વધી ગઈ છે. બુધવારે જાહેર થયેલી એમપીસીની બેઠકની વિગતો અનુસાર આ સમયગાળા દરમિયાન શક્તિકાંત દાસ દ્વારા આપવામાં આવેલા સંકેતો પરથી કહી શકાય કે, તેઓ ફરી એકવાર જનતાને ઝટકો આપી શકે છે. વિગતો રજૂ કરતાં તેમણે એમ પણ કહ્યું છે કે, વધતી કિંમતો અને ફુગાવાના કારણે મોંઘવારી અંગે ઘણી અનિશ્ચિતતા છે. તેમણે કહ્યું કે, તેના પર અંકુશ લાવવા માટે આગામી દિવસોમાં વ્યાજદરમાં વધારો કરવાનો અવકાશ છે.

રેપો રેટ વધીને 6.75 ટકા થઈ જશે ? 
નિષ્ણાતોએ એવી પણ આશંકા વ્યક્ત કરી છે કે, આગામી MPC બેઠકમાં રિઝર્વ બેંક ફરી એકવાર રેપો રેટમાં 0.25 ટકા અથવા 25 બેસિસ પોઈન્ટનો વધારો કરી શકે છે. જો RBI આ નિર્ણય લેશે તો રેપો રેટ વધીને 6.75 ટકા થઈ જશે. આ નિર્ણય જનતા પર દેવાનો બોજ વધારનાર સાબિત થશે. રેપો રેટમાં વધારાને કારણે હોમ લોન, કાર લોન અને પર્સનલ લોન સહિત તમામ પ્રકારની લોન મોંઘી થશે અને વધુ EMI ચૂકવવી પડશે.

ગયા વર્ષે મેથી રેપો રેટ કેવી રીતે વધ્યો ? 
નોંધનીય છે કે, ગયા વર્ષે મે મહિનાથી રિઝર્વ બેંકે રેપો રેટમાં 2.50 ટકાનો વધારો કર્યો છે. મોંઘવારીના ઊંચા સ્તરને અંકુશમાં રાખવા માટે 2022માં જ તેમાં પાંચ વખત વધારો કરવામાં આવ્યો હતો. તેની અસર પણ દેખાઈ હતી અને ફુગાવાનો દર અંકુશમાં આવ્યો હતો. છતાં ફેબ્રુઆરી 2023માં સેન્ટ્રલ બેંકે પોલિસી રેટ વધારવાનો નિર્ણય લીધો હતો. જો તમે રેપો રેટમાં થયેલા વધારા પર નજર નાખો તો મે 2022માં 0.40%, જૂન 2022માં 0.50%, ઓગસ્ટ 2022માં 0.50%, સપ્ટેમ્બર 2022માં 0.50% અને ડિસેમ્બર 2022માં 0.35%નો વધારો થયો હતો. આ પછી, ફેબ્રુઆરી 2023 માં ફરીથી તેમાં 0.25% નો વધારો કરવામાં આવ્યો.

રેપો રેટમાં વધારાને કારણે વધે છે EMI 
RBI દ્વારા નક્કી કરાયેલ રેપો રેટની સીધી અસર બેંક લોન પર પડે છે. જ્યારે તે ઘટે છે, ત્યારે લોન સસ્તી થાય છે અને તે વધ્યા પછી, બેંકો પણ તેમની લોન મોંઘી કરે છે. તેની અસર હોમ લોન, ઓટો લોન, પર્સનલ લોન જેવી તમામ પ્રકારની લોન પર પડે છે. અહીં એ સમજવું અગત્યનું છે કે રેપો રેટ એ દર છે કે જેના પર આરબીઆઈ બેંકોને ધિરાણ આપે છે, જ્યારે રિવર્સ રેપો રેટ એ દર છે કે જેના પર આરબીઆઈ નાણાં રાખવા માટે બેંકોને વ્યાજ આપે છે. રેપો રેટમાં ઘટાડો થવાને કારણે લોનની EMI ઘટે છે, જ્યારે રેપો રેટમાં વધારો થવાથી તમામ પ્રકારની લોન મોંઘી થાય છે અને આ ક્રમમાં EMIમાં પણ વધારો થાય છે.