Arvind Kejriwal : દિલ્હીના મુખ્યમંત્રી અરવિંદ કેજરીવાલની મુશ્કેલીમાં ફરી એકવાર વધારો થયો છે. વાત જાણે એમ છે કે, એન્ફોર્સમેન્ટ ડિરેક્ટોરેટ એટલે કે EDએ ફરી એકવાર દિલ્હીના મુખ્યમંત્રી અરવિંદ કેજરીવાલને સમન્સ મોકલ્યું છે. આ 9મી વખત છે જ્યારે કેન્દ્રીય એજન્સીએ તેમને પૂછપરછ માટે બોલાવ્યા છે. આ સમન્સમાં તેમને 21 માર્ચે હાજર થવા માટે કહેવામાં આવ્યું છે. અગાઉના સમન્સ પર હાજર ન થવાના કેસમાં શનિવારે જ તેમને દિલ્હીની કોર્ટમાંથી જામીન મળી ગયા હતા.
કેન્દ્રીય એજન્સીએ 2 નવેમ્બર 2023ના રોજ મુખ્ય પ્રધાન અરવિંદ કેજરીવાલને પહેલું સમન્સ મોકલ્યું હતું પરંતુ તેઓ હાજર થયા ન હતા. આ પછી એજન્સીએ તેમને 21 નવેમ્બર, 3 જાન્યુઆરી, 18 જાન્યુઆરી, 2 ફેબ્રુઆરી, 19 ફેબ્રુઆરી, 26 ફેબ્રુઆરી અને 4 માર્ચે સમન્સ મોકલ્યા હતા. CM કેજરીવાલ કોઈ સમન્સ પર હાજર ન થયા અને કેન્દ્ર સરકાર પર એજન્સીના દુરુપયોગનો આરોપ લગાવ્યો. આમ આદમી પાર્ટી અને દિલ્હીના મુખ્યમંત્રીનો દાવો છે કે, કેન્દ્રીય એજન્સી ED તેમની ધરપકડ કરવા માંગે છે.
ગઈકાલે દિલ્હી કોર્ટમાંથી મળ્યા હતા જામીન
દિલ્હી લિકર પોલિસી કૌભાંડ કેસની તપાસમાં સામેલ થવા માટે મોકલવામાં આવેલા સમન્સના ભંગ પર ED કોર્ટમાં પહોંચી હતી. તેની સામે બે ફરિયાદો કરવામાં આવી હતી અને ત્યારબાદ તેઓ શનિવારે કોર્ટમાં હાજર થયા હતા. અગાઉની સુનાવણીમાં મુખ્યમંત્રી વીડિયો કોન્ફરન્સિંગ દ્વારા બેન્ચ સમક્ષ હાજર થયા હતા. જોકે રાઉઝ એવન્યુ કોર્ટે કહ્યું કે, તેમની સામેના કેસ જામીનપાત્ર છે અને કુલ રૂ. 50,000ના બે બોન્ડ પર તેમને જામીન આપ્યા છે.
ચૂંટણીમાં 45 કરોડની કલેક્શનનો ઉપયોગ
દિલ્હી લિકર પોલિસી કૌભાંડ કેસમાં અત્યાર સુધીમાં છ ચાર્જશીટ દાખલ કરવામાં આવી છે. કેન્દ્રીય એજન્સીએ તેની છઠ્ઠી ચાર્જશીટમાં AAP રાજ્યસભાના ભૂતપૂર્વ સાંસદ સંજય સિંહ અને તેમના સહયોગી સર્વેશ મિશ્રાનું નામ આપ્યું હતું. એજન્સીએ દાવો કર્યો છે કે, આમ આદમી પાર્ટીએ ગોવા વિધાનસભાની ચૂંટણીમાં આ નીતિ હેઠળ એકત્રિત થયેલા 45 કરોડ રૂપિયાનો ઉપયોગ કર્યો હતો.
વધુ વાંચો: દરિયાઈ ડાકૂઓ પર કાળ બનીને તૂટી પડી ઈન્ડીયન નેવી, છોડાવ્યું મોટું જહાજ, મધદરિયે દિલધડક ઓપરેશન
કેન્દ્રએ કેજરીવાલની ધરપકડનો આદેશ આપ્યો ?
કેન્દ્રીય એજન્સી EDએ તાજેતરમાં દિલ્હી લિકર પોલિસી કૌભાંડ કેસમાં BRS નેતા કે કવિતાની ધરપકડ કરી છે. આ સિવાય સંજય સિંહ અને આમ આદમી પાર્ટીના મનીષ સિસોદિયા આ કેસના આરોપમાં જેલમાં છે. આમ આદમી પાર્ટીનો દાવો છે કે, કેન્દ્ર સરકારે EDને સીએમ કેજરીવાલની ધરપકડ કરવાનો આદેશ આપ્યો છે, જેથી તેઓ લોકસભા ચૂંટણીમાં પ્રચાર ન કરી શકે.
VTV Gujarati Newsની તમામ અપડેટ સૌથી પહેલા મેળવવા માટે અમારી WhatsApp ચેનલ ફોલો કરો
