લ્યો બોલો.! / સ્માર્ટફોનની સહાય યોજનામાં વહેલા તે પહેલા, અરજીઓનો રાફડો ફાટતાં એક જ દિવસમાં ટાર્ગેટ પૂર્ણ, સરકાર આપે છે આટલી સહાય

• ખેડૂત પોર્ટલ પર સહાય યોજનાની અરજીનો લક્ષ્યાંક  એક  જ દિવસમાં બંધ
• કેટલાક તાલુકાઓમાં માત્ર 1 જ કલાકમાં લક્ષ્યાંક જેટલી અરજી મળી
• બપોરના પછી મોટાભાગના તાલુકાઓમાં ઓનલાઇન અરજી સબમીટ જ ન થઇ

 ખેડૂત પોર્ટલ પર સ્માર્ટ ફોનની સહાય યોજનાની અરજીનો લક્ષ્યાંક એક જ દિવસમાં બંધ કરવામાં આવતા અમુક તાલુકાઓનાં  ખેડૂતો અરજી કરી શક્યા નથી. ત્યારે કેટલાક તાલુકાઓમાં માત્ર 1 જ કલાકમાં લક્ષ્યાંક જેટલી અરજી ખેતી વિભાગને મળી ગઈ હતી. આજે સવારે 10:30 વાગે ઓનલાઈન અરજી ખુલી અને થોડા સમયમાં જ અરજી સબમીટ થવાની બંધ થઈ ગઈ હતી. સરકારે ખેડૂતોને શૈક્ષણિક હેતુથી સ્માર્ટ ફોનમાં 6 હજારની સહાયની યોજના અમલમાં મુકી છે.

મોટાભાગના તાલુકાઓમાં ઓનલાઇન અરજી સબમીટ જ ન થઇ
ખેડૂતો પોર્ટલ પર 14 મી જૂન સુધી અરજી સ્વીકારવાની હતી. પરંતું 1 જ દિવસમાં કેટલાક તાલુકામાં 110 ટકાથી પણ વધુ અરજીઓ મળી હતી. અગાઉ ડ્રો સીસ્ટમથી સહાય ચૂકવતા હતા. હવે વહેલા તે પહેલા ધોરણે સરકાર સહાય કરશે. તાલુકા દીઠ લક્ષ્યાંક હોય તેના કરતા 110 ટકા અરજીઓ ઓનલાઈન મંગાવવાની હતી. ત્યારે બપોરના 12 વાગ્યા પછી મોટાભાગના તાલુકાઓમાં ઓનલાઈન અરજી સબમીટ જ ન થઈ.