- ડેનમાર્કના રક્ષા મંત્રાલયે સરકારી કર્મચારીઓના ફોનમાં ટિક ટોકના ઉપયોગ પર પ્રતિબંધ લગાવ્યો
- ડેનમાર્ક સરકારે એપની સુરક્ષા અને ડેટા ગોપનીયતાને લઈ ચિંતા વ્યક્ત કરી
- અમેરિકાની સેનેટે પણ આ અંગે એક બિલ પાસ કર્યું હતું
શોર્ટ વીડિયો પ્લેટફોર્મ ટિકટોક પર પ્રતિબંધ મૂકવાનો સિલસિલો યથાવત છે. અમેરિકા બાદ હવે ડેનમાર્કના રક્ષા મંત્રાલયે સરકારી કર્મચારીઓના ફોનમાં ટિક ટોકના ઉપયોગ પર પ્રતિબંધ લગાવ્યો છે. નાટો સદસ્ય ડેનમાર્કના રક્ષા મંત્રાલયે સાઈબર સિક્યુરિટીને લઈને આ પગલું ભર્યું છે. ડેનમાર્ક સરકારે એપની સુરક્ષા અને ડેટા ગોપનીયતાને લઈ ચિંતા વ્યક્ત કરી છે. તમને જણાવી દઈએ કે આ પહેલા અમેરિકામાં રાષ્ટ્રીય સુરક્ષાનો હવાલો આપી સરકારી ઉપકરણોમાં ટિક ટોકના ઉપયોગ પર પ્રતિબંધ મુકવામાં આવ્યો છે.
કર્મચારીઓને ટિક ટોક હટાવવા આદેશ
નાટો સદસ્ય ડેનમાર્કના રક્ષા મંત્રાલયે તેમના કર્મચારીઓને સાયબર સિક્યુરિટીનો હવાલો આપી તેમના કામના ફોન પર વિડિયો-શેરિંગ એપ્લિકેશન ટિકટોકને હટાવી નાખવા સૂચના આપી છે. રક્ષા મંત્રાલયે કહ્યું કે સત્તાવાર એકમો પર એપ્લિકેશનના ઉપયોગ પર પ્રતિબંધ મૂકવામાં આવ્યો છે. રક્ષા મંત્રાલય દ્વારા જારી કરવામાં આવેલા આદેશમાં કહેવામાં આવ્યું છે કે જો કર્મચારીઓના સર્વિસ ફોન અને અન્ય ઓફિશિયલ ઉપકરણો પર ટિક ટોક ઇન્સ્ટોલ કરેલું હોય તો તેને તાત્કાલિક હટાવી દેવામાં આવે.
એક નિવેદનમાં મંત્રાલયે કહ્યું કે સ્કૈંડિનેવિયાઈ દેશના સેન્ટર ફોર સાઈબર સિક્યુરિટીએ મૂલ્યાંકન કર્યું હતું કે એપ્લિકેશને ચોક્કસ અધિકારો અને ઉપકરણની ઍક્સેસ માંગી હતી, જેનાથી જાસૂસીનો ખતરો હતો. ગયા મહિને ડેનમાર્કની સંસદે 179 સભ્યોની વિધાનસભામાં સાંસદો અને સ્ટાફને જાસૂસીના જોખમનો હવાલો આપી સાયબર સુરક્ષા ઉપાય તરીકે કામના ફોન પર ટિક ટોક રાખવા વિરુદ્ધ આગ્રહ કર્યો હતો.
અમેરિકાએ ટિકટોકને સુરક્ષા માટે ખતરો ગણાવ્યો
અમેરિકાએ હાલમાં જ સરકારી માલિકીના તમામ ગેજેટ્સ પર શોર્ટ વિડિયો પ્લેટફોર્મ ટિક ટોક પર પ્રતિબંધ મૂક્યો છે. હાલમાં જ રાષ્ટ્રીય સુરક્ષાનો હવાલો આપી અમેરિકાની સેનેટે પણ આ અંગે એક બિલ પાસ કર્યું હતું. આ બિલમાં સરકારી કર્મચારીઓ અને સરકારી ગેજેટ્સમાં ટિક ટોકના ઉપયોગ પર પ્રતિબંધ મૂકવાની વાત કહેવામાં આવી હતી.
સુરક્ષાને ધ્યાનમાં રાખીને પ્લેટફોર્મ પર પ્રતિબંધ લાદવામાં આવ્યો હતો. જો કે, આ સામાન્ય યૂઝર્સ માટે પ્રતિબંધ ન હતો. સરકારી સાધનોમાંથી શોર્ટ વિડિયો પ્લેટફોર્મ ટિકટોકને તાત્કાલિક અનઇન્સ્ટોલ કરવા સૂચના આપવામાં આવી હતી. એવો દાવો કરવામાં આવી રહ્યો છે કે સરકાર ટૂંક સમયમાં આ અંગે કાયદો બનાવી શકે છે.
