ગંભીર આક્ષેપ / કોંગ્રેસનો આરોપ: AAP નેતા ટિકિટ માટે મહિલાઓનું કરે છે યૌન શોષણ, આમ આદમી પાર્ટીએ દાવો ફગાવી ચેનલ સામે પણ નોંધાવી ફરિયાદ

• ગુજરાત ચૂંટણી પહેલા આક્ષેપ-પ્રતિઆક્ષેપોનો દોર શરૂ 
• AAP નેતા ટિકિટ માટે મહિલાઓનું કરે છે યૌન શોષણ: કોંગ્રેસ 
• AAP પાર્ટીએ દાવો ફગાવી ચેનલ સામે નોંધાવી ફરિયાદ

ગુજરાતમાં ચૂંટણીનું બ્યુગલ વાગી ગયું છે. હવે જેમ જેમ મતદાનની તારીખ નજીક આવી રહી છે તેમ તેમ આક્ષેપ પ્રતિઆક્ષેપનો દોર પણ શરૂ થયો છે. વાસ્તવમાં ગુજરાત કોંગ્રેસે આમ આદમી પાર્ટીના એક નેતા પર મોટો આરોપ લગાવ્યો છે. ગુજરાત કોંગ્રેસનો આરોપ છે કે, AAP નેતા મહિલાઓને ટિકિટ અપાવવાના નામે 'યૌન શોષણ' કરી રહ્યા છે. આ પછી તેમને 'બ્લેકમેલ' કરવામાં આવી રહ્યા છે. જોકે આમ આદમી પાર્ટીએ આ મામલે પોલીસમાં ફરિયાદ નોંધાવી છે.

ન્યૂઝ એજન્સી પીટીઆઈના જણાવ્યા અનુસાર કોંગ્રેસે આમ આદમી પાર્ટીના નેતા પર આરોપ લગાવતા એક ગુજરાતી ચેનલ દ્વારા ચલાવવામાં આવેલા વીડિયોને ટાંક્યો છે. આ સાથે પ્રેસ કોન્ફરન્સમાં આ વીડિયો ક્લિપ પણ ચલાવવામાં આવી હતી. પ્રદેશ કોંગ્રેસના પ્રવક્તા પ્રગતિબેન આહિરે જણાવ્યું હતું કે, ગુજરાતીઓનું ગૌરવ અને મહિલાઓના ગૌરવને ઠેસ પહોંચાડનારાઓને ગુજરાતની જનતા બક્ષશે નહીં.

શું કહ્યું આમ આદમી પાર્ટીએ ? 

આમ આદમી પાર્ટીએ અમદાવાદના સાયબર સેલમાં ગુજરાતી ન્યૂઝ ચેનલ વિરુદ્ધ ફરિયાદ નોંધાવી છે. એવું કહેવામાં આવી રહ્યું છે કે, તેમના નેતા વિરુદ્ધ જે વીડિયો સર્ક્યુલેટ કરવામાં આવી રહ્યો છે તેને મોર્ફ કરવામાં આવ્યો છે. AAP તરફથી કહેવામાં આવ્યું છે કે, આ વીડિયો દ્વારા તેમના નેતાની છબીને બદનામ કરીને તેમને બદનામ કરવામાં આવ્યા છે. એજન્સી અનુસાર આમ આદમી પાર્ટીના લીગલ સેલ દ્વારા દાખલ કરવામાં આવેલી ફરિયાદમાં કહેવામાં આવ્યું છે કે, ડિસેમ્બરમાં થનારી વિધાનસભા ચૂંટણી પહેલા પાર્ટીની પ્રતિષ્ઠાને નુકસાન પહોંચાડવા માટે જ આ વીડિયો પ્રસારિત કરવામાં આવ્યો હતો.