એક્શન / વડોદરાના ગામેઠા ગામમાં જૂથ અથડામણ: 250 લોકો સામે FIR, ગત રાત્રીથી ભારે સંખ્યામાં પોલીસ ફોર્સ તૈનાત

• જૂથ અથડામણ મામલે કાર્યવાહી
• વડુ પોલીસ સ્ટેશનમાં ગુનો નોંધાયો
• 200થી 250 લોકો સામે ગુનો દાખલ કરાયો

વડોદરાના ગામેઠા ગામમાં જૂથ અથડામણ મામલે કાર્યવાહી કરવામાં આવી છે. જૂથ અથડામણ મામલે વડુ પોલીસ સ્ટેશનમાં ગુનો નોંધાયો છે. બંને જૂથના 200થી 250 લોકો સામે ગુનો નોંધાયો છે. મહત્વનું છે કે, ગતરોજ સમાધાન માટે યોજાયેલી બેઠકમાં એક સમાજની રજૂઆતનો વિરોધ કરતા મામલો ગરમાયો હતો. જે બાદ બે જૂથના લોકો સામસામે આવી ગયા હતા.

2 જૂથ વચ્ચે થઈ હતી અથડામણ 
વડોદરા જિલ્લાના પાદરા તાલુકાના ગામેઠા ગામે ગતરોજ જાતિવિષયક શબ્દને લઈને બબાલ થઈ હતી. ગામેઠા ગામે જાતિવિષયક શબ્દને લઈને બે સમુદાયના લોકો વચ્ચે ઉગ્ર બોલાચાલી થઈ હતી. બંન્ને જૂથના લોકો સામસામે આવી ગયા હતા. બે સમુદાયના લોકો વચ્ચે બબાલ થતા ગામમાં તંગદીલીનો માહોલ સર્જાયો હતો. 

ગામમાં ગોઠવાયો પોલીસ બંદોબસ્ત
આ બનાવની જાણ થતાં સ્થાનિક પોલીસ સહિત ઉચ્ચ અધિકારીઓનો કાફલો ઘટના સ્થળે દોડી આવ્યો હતો. જે બાદ ગામમાં ચુસ્ત બંદોબસ્ત ગોઠવી દેવામાં આવ્યો હતો. ઘટનાને લઇ પોલીસનો મોટો કાફલો ખડકાયો હતો. આ બનાવને પગલે ગામ ફેરવાયું પોલીસ છાવણીમાં ફેરવાયું હતું. 

થોડા દિવસ અગાઉ સર્જાયો હતો વિવાદ
અત્રે ઉલ્લેખનીય કે, એક અઠવાડિયા અગાઉ જ પાદરાના ગામેઠા ગામે માનવતા શર્મશાર કરતી ઘટના સામે આવી હતી. ગામેઠા ગામના લોકોએ ગામના સ્મશાનમાં દલિત સમાજના 68 વર્ષીય વૃદ્ધના અંતિમસંસ્કાર કરવા ન દેતાં ભારે વિવાદ સર્જાયો હતો. 15 કલાક સુધી મૃતદેહ પડી રહ્યા બાદ પરિવારજનોએ મૃતક કંચનભાઇ વણકરના અંતિમસંસ્કાર સ્મશાનથી દૂર કરવાની ફરજ પડી હતી. 

13 લોકો સામે નોંધાઈ હતી ફરિયાદ
આ ઘટનાને પગલે દલિત સમાજમાં ભારે રોષ ભભૂકી ઉઠ્યો હતો. જે બાદ સમાજના અગ્રણીએ વડું પોલીસ મથકે પહોંચ્યા હતા અને ગામના સરપંચના પતિ સહિત 13 સામે ફરિયાદ નોંધાવી હતી.  જે બાદ પોલીસે ગુનો દાખલ કરી કાર્યવાહી હાથ ધરી હતી. પોલીસે તમામની ધરપકડ કરીને કાયદેસરની કાર્યવાહી હાથ ધરી હતી.