ફરિયાદ / ધારાસભ્યના જમાઈએ મહિલાની છેડતી કરી-વૃદ્ધે વિરોધ કર્યો તો માર્યો માર... જાણો શું છે સુરતનો સમગ્ર મામલો

• કુમાર કાનાણીના જમાઈ સામે ફરિયાદ 
• કાપોદ્રા પોલીસ સ્ટેશનમાં ફરિયાદ દાખલ કરાઈ
• જગદીશ કોલડીયા સામે દાદાગીરીનો આરોપ

સુરતથી એક મોટા સમાચાર સામે આવ્યા છે. સુરતની વરાછા બેઠક પરના ધારાસભ્ય કુમાર કાનાણીના જમાઈ સામે કાપોદ્રા પોલીસ સ્ટેશનમાં ફરિયાદ નોંધાઈ છે. ધારાસભ્ય કાનાણીના જમાઈ જગદીશ કોલડીયા સામે મહિલાની છેડતી કરવાનો આક્ષેપ કરવામાં આવ્યો છે. સાથે વિરોધ કરવા જતાં વૃદ્ધને પણ મારમાર્યો હોવાનો દાવો કરવામાં આવ્યો છે.

કાપોદ્રા પોલીસ સ્ટેશનમાં ફરિયાદ
જગદીશ કોલડીયા વિરુદ્ધ કાપોદ્રા પોલીસ સ્ટેશનમાં મહિલાની છેડતી કરવાની ફરિયાદ નોંધાવામાં આવી છે. ફરિયાદીએ જગદીશ કોલડીયા પર 6-7 વર્ષથી હેરાન કરતો હોવાનો આક્ષેપ લગાવ્યો છે. સાથે જ ફરિયાદીએ છેડતીનો વિરોધ કરતાં જગદીશ કોલડીયાએ માર માર્યો હોવાનું પણ ફરિયાદમાં જણાવ્યું છે. 

કુમાર કાનાણીના પુત્ર અને પોલીસ કોન્સ્ટેબલ વચ્ચે થયો હતો વિવાદ
અત્રે ઉલ્લેખનીય છે કે, સુરતમાં મહિલા કોન્સ્ટેબલ અને ધારાસભ્ય કુમાર કાનાણીના પુત્ર પ્રકાશ કાનાણી વચ્ચે લોકડાઉનમાં કર્ફ્યૂના સમયે વિવાદ થયો હતો.  જેના વીડિયો અને ઓડિયો વાઈરલ થયા હતા. ત્યારબાદ સુરત પોલીસ કમિશનર દ્વારા તપાસના આદેશ આપવામાં આવ્યા હતા. જેથી વરાછા પોલીસ સ્ટેશનમાં મંત્રી કાનાણાની પુત્ર પ્રકાશ કાનાણી અને તેના બે મિત્રો વિરુદ્ધ કર્ફ્યુ ભંગનો ગુનો નોંધી ત્રણેયની અટકાયત કરવામાં આવી હતી. 

પોલીસે કરી હતી અટકાયત 
કુમાર કાનાણીના પુત્ર અને મહિલા કોન્સ્ટેબલ વચ્ચે વિવાદનો મુદ્દો ટોક ઓફ ધ ટાઉન બન્યો હતો. આ મામલે સોશિયલ મીડિયામાં ટ્રેન્ડ પણ શરુ થયો હતો. જોકે, આખરે સમગ્ર મામલે પોલીસ કમિશનરે તપાસના આદેશ આપ્યા હતા. જેમાં વરાછા પોલીસે આરોગ્ય મંત્રી કુમાર કાનાણીના પુત્ર પ્રકાશ અને તેના બે મિત્રો સામે કર્ફ્યું ભંગ બદલ ગુનો નોંધી અટકાયત કરી હતી. દરમિયાન ગણતરીના કલાકોમાં તેઓને જામીન પર મુક્ત કર્યા હતા