- પંજાબ વિધાનસભાની ચૂંટણી 2022
- શરુઆતી પરિણામોમાં AAP આગળ
- AAP કન્વીનર અરવિંદ કેજરીવાલની પ્રથમ પ્રતિક્રિયા
પંજાબ વિધાનસભાની ચૂંટણીના શરુઆતી પરિણામોમાં આમ આદમી પાર્ટીને સ્પષ્ટ બહુમતી મળી છે. જેને લઇને આપના કાર્યકરોમાં ખુશીની લાગણી જોવા મળી રહી છે. પંજાબમાં આપના પ્રદર્શન બાદ દિલ્હીના મુખ્યમંત્રી અરવિંદ કેજરીવાલે પંજાબના લોકોને શુભકામના પાઠવી. મહત્વનું છે કે પંજાબમાં આપ 91 બેઠક પર આગળ ચાલી રહ્યું છે.
અરવિંદ કેજરીવાલની પ્રથમ પ્રતિક્રિયા
આમ આદમી પાર્ટીના કન્વીનર અને દિલ્હીના મુખ્યમંત્રી અરવિંદ કેજરીવાલે પંજાબમાં શરૂઆતી જીત બાદ પ્રથમ પ્રતિક્રિયા આપી. તેઓએ ટ્વિટ કરતા જણાવ્યું કે પંજાબની જનતાને આ ક્રાંતિ માટે ખૂબ ખૂબ અભિનંદન. સાથે જ તેઓએ પંજાબના સીએમ પદના દાવેદાર ભગવંત માન સાથેનો ફોટો પણ ટ્વિટ કર્યો છે. તેઓને પણ શુભકામના પાઠવી.
આ દિલ્હી મોડલની જીત છે- મનીષ સિસોદિયા
દિલ્હીના ડેપ્યુટી સીએમ મનીષ સિસોદિયાએ પંજાબમાં શરૂઆતી લીડ જોતા જણાવ્યું કે પંજાબની જનતાએ કેજરીવાલના શાસન મોડલને તક આપી છે. આજે આખા દેશમાં સ્પષ્ટ થઈ ગયું છે કે લોકો વિચારે છે કે જો અરવિંદ કેજરીવાલ હશે તો ઇમાનદારીથી વેપાર, રોજગાર, શિક્ષા અને સ્વાસ્થ્યની સેવાઓ મળી શકે છે.
રાઘવ ચડ્ડાએ કહ્યું- AAP કોંગ્રેસનું સ્થાન લેશે
પંજાબમાં AAPના ઉદય વચ્ચે પાર્ટીના સહ પ્રભારી રાઘવ ચડ્ડાએ કહ્યું કે આ નેતાઓ લોકોના ખિસ્સામાંથી પૈસા કાઢીને પોતાના મહેલ સજાવી રહ્યા છે. આજે તેમના મહેલોમાં લગાવાયેલી દરેક ઈંટ સામાન્ય માણસના લોહી અને પરસેવાની ઈંટ છે. હવે આ આખી સિસ્ટમ બદલવી પડશે. આજનો દિવસ ભારતના ઈતિહાસનો એક મોટો દિવસ છે. આગામી દિવસોમાં સમગ્ર દેશમાં કોંગ્રેસનું સ્થાન AAP બનશે.
