- ચારધામ યાત્રા વચ્ચે હવામાન વિભાગનું ઉત્તરાખંડના 4 જિલ્લાઓને લઈને એલર્ટ જાહેર
- ઉત્તરાખંડના જિલ્લાઓમાં પાંચ દિવસ સુધી હિમપ્રપાતની ચેતવણી જાહેર કરી
- હવામાન વિભાગે મુસાફરોને કહ્યું છે કે, તેઓ અત્યારે જ્યાં છે ત્યાં જ રોકાઈ જાય
ચારધામ યાત્રા વચ્ચે હવામાન વિભાગે ઉત્તરાખંડના ચાર જિલ્લાઓને લઈને એલર્ટ જાહેર કર્યું છે. વાત જાણે એમ છે કે, હવામાન વિભાગે ઉત્તરાખંડના આ જિલ્લાઓમાં પાંચ દિવસ સુધી હિમપ્રપાતની ચેતવણી જાહેર કરી છે. આ સાથે વહીવટીતંત્રને સતર્ક રહેવા સૂચના આપવામાં આવી છે. અને મધ્યપ્રદેશ, દિલ્હી-એનસીઆર, ઉત્તર પ્રદેશ, ગુજરાત અને દેશના અન્ય રાજ્યોમાંથી આવતા યાત્રાળુઓને ઉત્તરાખંડના હવામાનની અપડેટ મળતાં જ યાત્રા શરૂ કરવા અપીલ કરી હતી.
હકીકતમાં યમુનોત્રીમાં આખો દિવસ હિમવર્ષા ચાલુ રહે છે. આ તરફ ગંગોત્રીના ઊંચા શિખરો પર નવેસરથી હિમવર્ષા અને ધામમાં વરસાદના સમાચાર છે. તેથી કેદારનાથમાં ભારે હિમવર્ષાને ધ્યાનમાં રાખીને રુદ્રપ્રયાગ જિલ્લા વહીવટીતંત્રે યાત્રિકોને સલામત સ્થળોએ રહેવાની અપીલ કરી છે. ઉલ્લેખનીય છે કે, ધામોમાં વરસાદી માહોલ જામી રહ્યો છે, જેના કારણે તાપમાનમાં પણ ઘટાડો નોંધાયો છે. આ કારણોસર હવામાન વિભાગે નવી ચેતવણી જારી કરતી વખતે મુસાફરોને કહ્યું છે કે, તેઓ અત્યારે જ્યાં છે ત્યાં જ રોકાઈ જાય અને હવામાનની અપડેટ મેળવ્યા પછી જ આગળ વધે.
અગાઉ પણ એલર્ટ જાહેર કરવામાં આવ્યું હતું
ચારધામ યાત્રાની શરૂઆતની સાથે જ હવામાન વિભાગે મંગળવારે પણ હિમવર્ષા અને હિમપ્રપાત માટે એલર્ટ જાહેર કર્યું હતું. ઉત્તરાખંડમાં હિમવર્ષા અને હિમપ્રપાતની ચેતવણી બાદ પ્રવાસીઓની સુરક્ષાને ધ્યાનમાં રાખીને સરકાર દ્વારા ગોમુખ ટ્રેક પર એક અઠવાડિયા માટે પ્રતિબંધ મૂકવામાં આવ્યો હતો. આ સાથે સરકાર પણ એલર્ટ મોડ પર આવી ગઈ છે. સરકારે ઉત્તરાખંડના ઉત્તરકાશી જિલ્લામાં કોઈપણ પ્રવાસીને સાહસિક રમતો અથવા ટ્રેકિંગ કરવા દેવાનો નિર્ણય કર્યો હતો.
ઉત્તરકાશી જિલ્લામાં વધુ હિમવર્ષા અને હિમપ્રપાતની ચેતવણીને ધ્યાનમાં રાખીને ગંગોત્રી રાષ્ટ્રીય ઉદ્યાન વહીવટીતંત્ર દ્વારા ઉત્તરકાશીના ગોમુખ ટ્રેકને આગામી એક સપ્તાહ માટે બંધ કરી દેવામાં આવ્યો હતો. ગંગોત્રી નેશનલ પાર્કના ડેપ્યુટી ડાયરેક્ટર રંગનાથ પાંડેએ આ માટે યોગ્ય આદેશ જાહેર કર્યા હતા. આદેશમાં કહેવામાં આવ્યું છે કે, જ્યારે હવામાન અનુકૂળ હશે ત્યારે જ પ્રવાસીઓને ગોમુખ તરફ જવાની મંજૂરી આપવામાં આવશે. ઉલ્લેખનીય છે કે, હિમવર્ષાના કારણે ચારધામ યાત્રા પર આવેલા કોઈપણ ભક્તને ગોમુખ જવાની મંજૂરી આપવામાં આવી નથી.
