નવસારી / ચડ્ડી બનિયાનધારી ગેંગ એક્ટિવ મોડમાં, 25 તોલા સોનું અને 5 તોલા ચાંદી ચોરીને રફુચક્કર થઈ ગયા

• નવસારીમાં ચડ્ડી બનીયાન ધારી ગેંગનો આતંક
• અંબાજી દર્શને ગયેલા પરિવારના ઘરમાં તસ્કરો ત્રાટક્યાં
• 24 તોલા સોનુ, 5 તોલા ચાંદી અને 15 હજાર રોકડની ચોરી

નવસારીમાં ચડ્ડી બનીયાન ધારી ગેંગે આતંક મચાવ્યો છે. નવસારીના જમાલપોર વિસ્તારની રાધેશ્યામ સોસાયટીમાં ચોરી થયાની ઘટના સામે આવી છે. જેમાં મોડી રાત્રે તસ્કરોએ બંધ બંગલાને ટાર્ગેટ કર્યો હતો. અંબાજી દર્શને ગયેલા પરિવારના ઘરમાં ચોરી થઇ છે. ચોરે 24 તોલા સોનું, 5 તોલા ચાંદી અને 15 હજાર રોકડ રકમની ચોરી કરી છે. જો કે, ચોરી કરતા તસ્કરોના CCTV ફુટેજ સામે આવ્યા છે. આ ઘટનાની જાણ થતા તુરંત ગ્રામ્ય પોલીસે તપાસ શરુ કરી દીધી છે.

કલોલનાં સૌમ્ય એપાર્ટમેન્ટમાં બંધ મકાનમાં ભરબપોરે ઘરફોડ ચોરી

બીજી બાજુ ગઇકાલે ગાંધીનગર કલોલના વખારીયા નગરમાં આવેલા સૌમ્ય એપાર્ટમેન્ટના બંધ મકાનમાં ભર બપોરે સોનાના દાગીના, ચાંદીના સિક્કા, યુએસ ડોલર અને દુબઈ દીરામ તેમજ રૂ. 2.38 લાખ રોકડા એમ મળીને કુલ 7.83 લાખની ચોરી થઇ હતી. જેથી આ મામલે કલોલ પોલીસ મથકમાં ગુનો દાખલ કરવામાં આવ્યો છે. આ મામલે પોલીસ તપાસમાં ઘરઘાટી મહિલા બપોરે કામ કર્યા બાદ તાળું મારીને ગયા બાદ ચોરી થયાનું સામે આવતા કોઈ જાણભેદુ જ આ ઘટનામાં સંડોવાયેલ હોવાનું પોલીસનું અનુમાન છે.

કડીના ચંદ્રાસણમાં મકાનમાંથી 1.14 લાખના દાગીનાની ચોરી

ત્રીજી ઘટનામાં કડી તાલુકાના ચંદ્રાસણા ગામે બંધ મકાનમાં ઘૂસીને રૂ. 1.14 લાખના દાગીનાની થયેલી ચોરી અંગે 15 દિવસ બાદ બાવલુ પોલીસ મથકે ફરિયાદ નોંધવામાં આવી. ચંદ્રાસણ ગામના ઇશ્વરજી ભગાજી ઠાકોરનું ઘર ખોલી અંદર ઘૂસેલા તસ્કરોએ તિજોરીમાંથી માલસામાન વેરવિખેર કરી નાખ્યો હતો. જેમાં એક કિલો વજનના ત્રણ જોડ ચાંદીના રમઝા રૂ.60 હજાર, 750 ગ્રામના બે જોડ ચાંદીના કાંબિયા રૂ.28 હજાર અને 100 ગ્રામ ચાંદીની પાયલ રૂ.6 હજાર, 150 ગ્રામની ત્રણ લકી રૂ. 9 હજાર અને એક ગ્રામ સોનાની ચુની રૂ.5 હજાર તેમજ 100 ગ્રામ ચાંદીનું મંગળસૂત્ર રૂ. 6 હજાર એમ મળી કુલ રૂ.1,14,000ના દાગીના ચોરી ગયા હતા.