- ભારત સરકારે મહત્ત્વપૂર્ણ નિર્ણય કર્યો
- 100 ટકાથી ઘટીને 15 ટકા થઈ જશે ટેક્સ
- ટેસ્લાના પ્રસ્તાવને ધ્યાનમાં રાખીને પોલિસી બનાવવામાં આવી રહી છે
ભારતીયો હવે સસ્તી વિદેશી ઈલેક્ટ્રિક ગાડીઓ ખરીદી શકશે. ઈલેક્ટ્રિક વાહનોને પ્રોત્સાહન આપવા માટે ભારત સરકારે એક મહત્ત્વપૂર્ણ નિર્ણય કર્યો છે. કેન્દ્ર સરકારે ભારતમાં આયાત થતી ઈલેક્ટ્રિક કાર પર ઈમ્પોર્ટ ટેક્સમાં ભારે કપાત થવાનો સંકેત આપ્યો છે. મીડિયા રિપોર્ટ અનુસાર ઈલેક્ટ્રિક વાહનપર ઈમ્પોર્ટ ટેક્સ 100%થી ઘટાડીને 15% કરવામાં આવી શકે છે. ઉપરાંત માનવામાં આવી રહ્યું છે કે, કેટલીક કાર પર EV આયાત કર પર ઘટાડો કરવામાં આવી શકે છે.
મીડિયા રિપોર્ટ અનુસાર ભારત સરકાર નવી ઈલેક્ટ્રિક વાહન નીતિ પર કામ કરી રહી છે. ટેસ્લાના પ્રસ્તાવને ધ્યાનમાં રાખીને પોલિસી બનાવવામાં આવી રહી છે. સરકાર કેટલીક કંપનીઓની ઈમ્પોર્ટેડ કારને કરમાં છૂટ આપી શકે છે. જે કંપનીઓ ભારતમાં પ્લાન્ટ નાખવાની યોજના બનાવી રહી છે, તે કંપનીઓને ધ્યાનમાં રાખીને આ પોલિસી બનાવવામાં આવી રહી છે.
15% ટેક્સ લાગશે
આ નવા નિર્ણય પછી ભારતમાં કાર આયાત કરતી કંપનીઓને કરમાં રાહત આપવામાં આવી શકે છે. ઈલેક્ટ્રિક કાર પર આયાત ડ્યૂટી 100 ટકાથી ઘટાડીને 15 ટકા રાખવાની રજૂઆત કરવામાં આવી છે. હાલના સમયમાં જે કારની કિંમત 40,000 ડોલરથી વધુ હોય તે કાર પર 100% ટેક્સ લાગુ થાય છે. 40,000 ડોલરથી ઓછી કિંમતની કાર પર 70% ટેક્સ વસૂલવામાં આવે છે. આ પોલિસીથી ટેસ્લાને ફાયદો થઈ શકે છે. ટેસ્લાએ ભારતમાં ઈલેક્ટ્રિક કારના ઉત્પાદન માટે પ્લાન્ટ લગાવવાનો પ્રસ્તાવ મુક્યો છે. હાલના સમયમાં ટેસ્લાની સૌથી વધુ લોકપ્રિય કાર Model Yની કિંમત 47,740 ડોલર છે. આ નવી પોલિસી લાગુ થયા પછી ભારતમાં આ કાર પર માત્ર 15% ઈમ્પોર્ટ ડ્યુટી લાગુ થશે.
ટાટા મોટર્સ શેર
વાહન પર ઈમ્પોર્ટ ડ્યુટી ઘટાડવાના સમાચાર સામે આવ્યા પછી ટાટા મોટર્સના શેરની કિંમતમાં 6.40 ટકા સુધીનો ઘટાડો થયો છે. ટાટા મોટર્સના શેરની કિંમતમાં ઘટાડો થતા આ શેરની કિંમત 600 રૂપિયા કરતા પણ ઓછી થઈ ગઈ છે. 2 મહિના પછી આ શેરની કિંમત નીચલા સ્તર પર પહોંચી ગઈ છે. ભારતીય ઈલેક્ટ્રિક બજારમાં સૌથી વધુ ભાગીદારી ટાટા મોટર્સની છે. ભારતમાં સૌથી વધુ ટાટા નેક્સનની ઈલેક્ટ્રિક કાર વેચાઈ રહી છે. ભારતમાં 100 ઈલેક્ટ્રિક કારમાંથી 80 કાર ટાટા મોટર્સની છે.
