- રખડતાં ઢોર મામલે હાઇકોર્ટની ફટકાર બાદ હવે તંત્ર એક્શન મોડમાં
- રખડતા ઢોર અંગે તંત્ર થયુ સાબદું, ઢોર પાર્ટી પર હુમલાની ઘટનાઓ વધી
- AMCની ટીમ ઢોર પકડવા પોલીસની ટીમ સાથે પહોંચી
Gujarat Stray Cattle News : રાજ્યમાં રખડતાં ઢોર મામલે ગુજરાત હાઇકોર્ટની ફટકાર બાદ હવે તંત્ર એક્શન મોડમાં આવ્યું છે. વાત જાણે એમ છે કે, વડોદરા, અમદાવાદ સહિતના શહેરોમાં આજથી રખડતા ઢોરને પકડવાની ઝુંબેશ શરૂ કરાઇ છે. આ તરફ જામનગરમાં તો આ ટીમ બે શિફ્ટમાં કામ કરશે. આ તરફ ઢોર પાર્ટીની ટીમો પર હુમલા વધતાં તંત્ર પોતાની સાથે પોલીસ રાખી રહી છે. આ તરફ વડોદરામાં કેટલ પોલિસીનો અમલ સાથે પોલીસ બંદોબસ્ત સાથે ઢોર પકડવાની કામગીરી શરૂ કરાઇ છે.
પોલીસને સાથે રાખી તંત્ર દ્વારા કામગીરી શરૂ
રખડતાં ઢોરનાં ત્રાસ સામે હાઇકોર્ટની ફટકાર બાદ તંત્ર દોડતું થયું છે. આ તરફ ઢોર પાર્ટીની ટીમો પર હુમલા વધતાં તંત્ર પોતાની સાથે પોલીસની ટીમ રાખી રહી છે. જેને લઈ આજે અમદાવાદના વાડજ વિસ્તારનાં કિરણ પાર્ક સોસાયટી પાસે ઢોર પકડવાની કામગીરી કરાઇ હતી. ઢોર પકડવામાં AMCનાં DYMCની ટીમ સાથે પોલીસ તૈનાત છે. AMC ની ટીમ પોલીસનો મોટો કાફલો લઇ ઢોર પકડવા પહોંચી હતી.
જામનગરમાં ઢોર પકડવા માટેના 8 કર્મીઓ કરશે કામ
હાઈકોર્ટની ટકોર બાદ જાગેલ તંત્ર હવે એક્શન મોડમાં આવ્યું છે. રખડતા ઢોરને પકડવા ફરી ઝુંબેશ શરૂ કરાઇ છે. જેના ભાગરૂપે જામનગર મનપાની ટીમ બે શિફ્ટમાં કામગીરી કરશે. આ સાથે ઢોર પકડવા માટેના 8 કર્મીઓ કામ કરશે. રખડતાં ઢોરને પકડી લેવા મનપા દ્વારા બે ટીમને શહેરમાં દોડતી કરવામાં આવશે.
વડોદરા કેટલ પોલિસીનો અમલ
વડોદરામાં આજથી કેટલ પોલિસીના અમલ સાથે પોલીસ બંદોબસ્ત સાથે ઢોર પકડવાની કામગીરી શરૂ કરાઇ છે. આ તરફ વારસિયા વિસ્તારમાં પશુમાલિકોએ હોબાળો કર્યો હોવાનું સામે આવ્યું છે. જેમાં માલધારીઓને શહેર બહાર જગ્યા ફાળવવા માંગ કરાઇ છે. જગ્યા ફાળવ્યા બાદ કેટલ પોલિસીનો અમલ કરવા માંગ કરાઇ છે. આ તરફ મનપાની ટીમ દ્વારા શહેરના વિવિધ વિસ્તારોમાંથી 11 ગાયો પકડવામાં આવી છે.
