સંસદ / લોકસભા બાદ હવે રાજ્યસભામાં પણ ભાજપ તરફથી કોઈ મુસ્લિમ ચહેરો નહીં હોય, ત્રણ મુસ્લિમ સાંસદની પૂરી થઈ રહી છે ટર્મ

• રાજ્યસભાના ઉમેદવારોની યાદી ભાજપે જાહેર કરી
• આ યાદીમાં કોઈ મુસ્લિમ ચહેરો દેખાયો નહીં
• લોકસભા બાદ રાજ્યસભામાં પણ મુસ્લિમ ઉમેદવાર નહીં

લોકસભા બાદ હવે રાજ્યસભામાં પણ ભાજપ તરફથી કોઈ મુસ્લિમ ચહેરો દેખાશે નહીં. 10 જૂન થનારી રાજ્યસભા ચૂંટણી માટે ભાજપે ઉમેદવારોની જાહેરાત કરી દીધી છે. પણ આ વખતે ઉમેદવારોમાં કોઈ પણ મુસ્લિમ ચહેરો દેખાયો નથી. આ અગાઉ પાર્ટીએ ત્રણ મુસ્લિમ નેતાઓને રાજ્યસભા સાંસદ બનાવ્યા હતા, જેમાં કેન્દ્રીય મંત્રી મુખ્તાર અબ્બાસ નકવી, પૂર્વ મંત્રી એમજે અકબર અને ઝફર ઈસ્લામનો સમાવેશ થાય છે પણ આ લોકોનો કાર્યકાળ હવે સમાપ્ત થવાનો છે, તો આવી રીતે હવે લોકસભા બાદ રાજ્યસભામાંથી પણ ભાજપ તરફથી કોઈ પણ મુસ્લિમ તહેરો સાંસદ નહીં હોય.

જો આ ત્રણ મુસ્લિમ સાંસદોની વાત કરીએ તો, મુખ્તાર અબ્બાસ નકવીનો કાર્યકાળ 7 જૂલાઈએ ખતમ થઈ રહ્યો છે. એમજે અકબરનો કાર્યકાળ 29 જૂને ખતમ થઈ રહ્યો છે અને ઝફર ઈસ્લામનો કાર્યકાળ 4 જૂલાઈએ ખતમ થઈ જશે.

મુખ્તાર અબ્બાસ નકવી રામપુર સીટ પરથી લડી શકે છે પેટાચૂંટણી

મુખ્તાર અબ્બાસ નકવી હાલમાં મોદી સરકારમાં મંત્રી પદ પર છે અને 6 મહિનામાં તે સાંસદ નહીં બની શકે તો, તેમનું મંત્રી પદ છીનવાઈ જશે. પણ સમાચાર એવા આવી રહ્યા છે પાર્ટી તેમને આ વખતે રામપુર સીટ પરથી લોકસભાની પેટાચૂંટણી લડાવી શકે છે. કારણ કે, સપા નેતા આઝમ ખાનના રાજીનામા બાદ રામપુર સીટ ખાલી થઈ ગઈ છે અને આ સીટ પર પેટાચૂંટણીથી જાહેરાત પણ થઈ ચુકી છે. મુખ્તાર અબ્બાસ નકવી પહેલા પણ રામપુર સીટ પરથી લોકસભા ચૂંટણી લડી ચુક્યા છે. 

લોકસભામાં પણ ભાજપનો કોઈ સાંસદ મુસ્લિમ નથી

લોકસભાની વાત કરીએ તો, પહેલાથી ભાજપમાં કોઈ મુસ્લિમ સાંસદ નથી. ગત ચૂંટણીમાં પણ પાર્ટી તરફથી કોઈ મુસ્લિમ ચહેરાને ટિકિટ આપવામાં આવ્યા હતી, પણ કોઈ મુસ્લિમ ચહેરો જીતી શક્યો નહોતો. પણ જો એનડીએની વાત કરીએ તો, બિહારના એક માત્ર મુસ્લિમ ચહેરા એવા મહેબૂબ અલી છે, જે લોજપાની સીટ પરથી જીતીને લોકસભા પહોંચ્યા હતા.