GST ચોરી / રાજકોટમાં સૌથી મોટા બોગસ બિલિંગ કૌભાંડનો પર્દાફાશ, સોની બજારમાં 1467 કરોડની ઘાલમેલ, 1ની ધરપકડ

• રાજકોટમાંથી સૌથી મોટુ બોગસ બિલિંગ કૌભાંડ ઉઘાડું પડ્યું
• સોની બજારમાં 1467 કરોડ બોગસ બિલિંગ કૌભાંડ ઝડપાયુ
• એક આરોપીને ઉઠાવી લેવાયો 

રાજ્યમાં અવારનવાર બોગસ બિલિંગ કૌભાંડના ભૂત ધૂણતા હોય છે. તેવામાં રાજકોટમાં અત્યાર સુધીનું સૌથી મોટુ બોગસ બિલિંગ કૌભાંડ સામે આવતા ખળભળાટ મચી ગયો છે. તપાસમાં રાજકોટ સોની બજારમાં 1467 કરોડનું બોગસ બિલિંગ કૌભાંડ ઝડપાયું છે.  જેને લઈને રાજકોટના આસ્થા ટ્રેડર્સના હિતેશ લોધિયાની ધરપકડ કરવામાં આવી છે.

ગોલ્ડના ખોટા બિલો બનાવી ૩% GSTની ચોરી કરી
અધિકારીઓની તપાસમાં સામે આવ્યું કે સોનાના ખોટા બિલો બનાવી 3% GSTની ચોરી કરાઈ હતી. વધુમાં 44 જુદા-જુદા વેપારીઓના બિલ પાસ-ઓન કર્યા હોવાનો પણ પર્દાફાશ થયો છે. જેને લઈને ઊંડી તપાસ હાથ ધરવામાં આવી છે. હવે આગામી સમયમાં સોની બજારમાં બિલો લેનાર તમામ વેપારીઓ સકંજામાં આવે તો નવાઈ નહિ!. તપાસમાં મસમોટા બિલિંગ કૌભાંડમાં રૂ. 44 કરોડની ઇનપુટ ટેક્સ ક્રેડિટ સામે આવતા સબંધિત વિભાગ દ્વારા આરોપી હિતેશ લોધિયાના ફોન, લેપટોપ સહિતની સામગ્રી જપ્ત કરાઈ છે. એટલું જ નહીં સમગ્ર સૌરાષ્ટ્રમાં પણ કૌભાંડના તાર ફેલાયેલા હોવાનો ખુલાસો થયો છે.

44 જુદા જુદા વેપારીઓના બિલો પાસ ઓન કર્યા હતા
આમ માત્ર રાજકોટ નહિ સૌરાષ્ટ્રના જિલ્લાઓમાં પણ બિલ આપ્યા હોવાનો ધડાકો થયો છે. મસમોટા બિલિંગ કૌભાડમાં રૂ.44 કરોડની ITC બહાર આવી.આસ્થા ટ્રેડિંગ કંપનીના બોગસ બિલિંગ ઝડપાતા વેપારી હિતેશ લોઢીયાને ઝડપી તેની પૂછપરછ હાથ ધરાઈ છે. હિતેશ લોઢીયાને કોર્ટમાં રજૂ કરાયા બાદ કોર્ટ દ્વારા 14 દિવસની જ્યુડીશિયલ કસ્ટડીમાં મોકલાયો છે.