ચોંકાવનારો ખુલાસો / મહાઠગ હિતેશ ઠાકર બનવા માંગતો હતો 'ક્લાસ વન અધિકારી', વડોદરામાં ચલાવતો ટ્યુશન ક્લાસિસ

• હિતેશ ઠાકરની પૂછપરછમાં ખુલાસો
• હિતેશ ક્લાસ વન અધિકારી બનવા માંગતો હતો
• ધંધો ભાંગી પડતા છેતરપિંડી આચરવી શરૂ કરી હતી

ભલભલાને બટાલીમાં ઉતારી દેનાર મહાઠગ હિતેશ ઠાકરની પૂછપરછમાં કેટલાક ખુલાસા થયા છે. આરોપી હિતેશ ઠાકર ક્લાસ વન અધિકારી અધિકારી બનવા માંગતો હતો અને તેણે 3થી 4 વખત સ્પર્ધાત્મક પરીક્ષા પણ આપી હતી પરંતુ પરીક્ષામાં પાસ ન થતા આરોપી શિક્ષક બનવાનું વિચાર્યું હતું

હિતેશ વડોદરામાં ખાનગી સ્કૂલમાં શિક્ષક હતો
આરોપી વડોદરામાં ખાનગી સ્કૂલમાં શિક્ષક તરીકે સેવા આપતો હતો તેમજ ટ્યુશન ક્લાસીસ પણ ચલાવતો હતો. કોરોનામાં ધંધો ભાંગી પડતા આરોપીએ છેતરપિંડી આચરવાનું શરૂ કર્યું  હતું. આરોપીએ અલ્પેશ નારિયા નામના વેપારી સાથે છેતરપિંડી આચરી હતી અને વેપારી સાથે 1.22 કરોડની છેતરપિંડી આચરી હતી. કોરોનામાં ધંધો ભાંગી પડતા તેણે પૈસા કમાવવાનો શોર્ટકટ રસ્તો અપવાવ્યો હતો. ભેજાબાજ ઠગ હિતેશ ઠાકરએ સેન્ટ્રલ આઈબીના અધિકારી તરીકેની ખોટી ઓળખ આપી જરૂરિયાતમંદ લોકોને ફસાવી ઠગાઈ કરવાનું શરૂ કર્યું હતું

શું છે સમગ્ર મામલો?
રાજકોટના સત્યસાંઈ હાર્ટ હોસ્પિટલ રોડ પર આવેલી ઈન્દ્રલોક રેસીડેન્સીમાં રહેતા અને કોપર વાયરનું કારખાનું ધરાવતા અલ્પેશ બાવનજીભાઈ નારીયાએ વડોદરાના માંજલપુર વિસ્તારમાં આવેલી શાંતિકુજ સોસાયટીમાં રહેતા અને પોતાને બોટાદમાં ડે.કલેક્ટર અને IBમાં ડેપ્યુટી ડાયરેક્ટર તરીકે ઓળખ આપનાર હિતેશ ઠાકર સામે છેતરપિંડીની ફરિયાદ નોંધાવી છે. 

1.22 કરોડની છેતરપિંડી
ફરિયાદમાં અલ્પેશ નારીયાએ જણાવ્યું છે કે, બે વર્ષ પહેલા તેમના ભાઈ વિજય નારીયાની ઓળખાણ વડોદરાના હિતેશ સાથે થઈ હતી. હિતેશ પોતે બોટાદમાં ડે.કલેક્ટર અને IBમાં ડેપ્યુટી ડાયરેક્ટર હોવાની ઓળખાણ આપી હતી. જે બાદ તેણે વિજયભાઈને કારખાના માટે સસ્તામાં સરકારી જમીન અપાવવાની અને ડિફેન્સમાં કોપર વાયરનો કોન્ટ્રાક્ટ અપાવાની લાલચ આપી હતી. જેના બદલામાં તેણે અલ્પેશભાઈ અને તેમના ભાઈ વિજયભાઈ પાસેથી 1.22 કરોડ રૂપિયા લીધા હતા. 

ખોટા કેસમાં ફસાવી દેવાની આપી ધમકી
લાંબો સમય થવા છતા હિતેશ ઠાકરે જમીન પણ અપાવી ન હતી તેમજ ડિફેન્સ વિભાગમાં કોપર વાયરનો ઓર્ડર પણ અપાવ્યો ન હતો. જ્યારે નકલી IAS પાસે અલ્પેશભાઈએ પૈસા પરત માંગતા તેણે ખોટા કેસમાં ફસાવી દેવાની અને ઇન્કમટેક્સની રેડ પડાવવાની ધમકી આપી હતી.