અનરાધાર / તૈયાર રહેજો! આવતી કાલથી મેઘરાજા ગુજરાતમાં ભૂક્કા બોલાવશે, અમદાવાદ, સાબરકાંઠા સહિતના જિલ્લાઓ પર વરસાદી આફત

• વરસાદને લઈને હવામાન વિભાગની આગાહી
• આગામી 5 દિવસ રહેશે વરસાદી માહોલ
• 3 દિવસ બાદ વરસાદનું જોર ઘટશે

 રાજ્યમાં વરસાદને લઈને હવામાન વિભાગ દ્વારા આગાહી કરવામાં આવી છે. ત્યારે આગામી 5 દિવસ સમગ્ર રાજ્યમાં વરસાદી માહોલ રહેશે. તેમજ 3 દિવસ બાદ વરસાદનું જોર ઘટશે. તેમજ મોટા ભાગનાં વિસ્તારમાં સામાન્ય વરસાદ પડશે. જેમાં દ્વારકા, જૂનાગઢ, રાજકોટ, ભાવનગર અને પોરબંદરમાં ભારે વરસાદ પડશે.

અમદાવાદમાં પણ ભારે વરસાદ પડવાની શક્યતા
દક્ષિણ ગુજરાતમાં સુરત, ભરૂચ, તાપી તેમજ ડાંગમાં અતિભારે વરસાદ તેમજ વલસાડ, નવસારીમાં પણ ધોધમાર વરસાદ થવાની સંભાવનાં છે. તેમજ સાબરકાંઠા, બનાસકાંઠામાં ભારે વરસાદ રહેશે.  ત્યારે આવતીકાલે ભારેથી અતિભારે વરસાદ વલસાડ અને નવસારીમાં પડશે. અમદાવાદમાં પણ ભારે વરસાદ પડવાની શક્યતા છે. રાજ્યમાં સીઝનનો 65 ટકા ઉપર વરસાદ નોંધાયો છે. 

અંબાલાલ પટેલે પણ વરસાદને લઈ કરી છે આગાહી 
અંબાલાલ પટેલના જણાવ્યા અનુસાર આગામી 24 જુલાઈએ બંગાળની ખાડીમાં બીજી સિસ્ટમ સક્રિય થશે. જેના કારણે આગામી 27થી 29 જુલાઈએ ગુજરાતમાં ફરી વરસાદ થઈ શકે છે. મુશળધાર વરસાદને પગલે નર્મદા નદીમાં પૂર આવવાની શક્યતા છે. સાથે જ સરદાર સરોવર ડેમ ઓવરફ્લો થવાની શક્યતા છે. ભારે વરસાદના કારણે ઉકાઈ ડેમની જળસપાટી પણ વધી શકે છે. 
રાજ્યમાં 61.20 લાખ હેક્ટર જમીનમાં ખરીફ પાકોનું વાવેતર 
રાજ્યમાં સાર્વત્રિક વરસાદ થતા ખેડૂતો ખુશ-ખુશાલ થયા છે. રાજ્યમાં ચાલુ વર્ષે સારો વરસાદ થતા ખરીફ પાકના વાવેતરમાં ગત વર્ષની સરખામણીએ આ વર્ષે નોંધપાત્ર વધારો થયો છે. રાજ્યમાં અત્યાર સુધીમાં કુલ 61.20 લાખ હેક્ટર જમીનમાં ખરીફ પાકોનું વાવેતર થયું છે. ગત વર્ષે આ સમયગાળા દરમિયાન રાજ્યમાં કુલ 55.41 લાખ હેક્ટરમાં વાવેતર થયું હતું.

મગફળી પાકનું પણ 15.84 લાખ હેક્ટરમાં વાવેતર
કપાસ બાદ રાજ્યમાં સૌથી વધુ તેલીબીયા પાકનું વાવેતર કરવામાં આવ્યું છે. ગુજરાતમાં અત્યારસુધીમાં કુલ 19.18 લાખ હેક્ટર જમીનમાં તેલીબીયા પાકોનું વાવેતર થયું છે, જે ગત વર્ષે આ સમયગાળા દરમિયાન 17.87 લાખ હેક્ટર હતું.રાજ્યના મુખ્ય તેલીબીયા પાક એવા મગફળીનું પણ રાજ્યમાં મોટા પ્રમાણમાં વાવેતર થયું છે. રાજ્યમાં આ વર્ષે મગફળી પાકનું પણ 15.84 લાખ હેક્ટર જેટલા વિસ્તારમાં વાવેતર થયું છે.