- હિંદુ પંચાંગનો ચોથો મહિનો અષાઢ
- પૂજા પાઠ માટે આ મહિનાનું અનેરું મહત્ત્વ
- 5 જૂનથી 4 જુલાઈ સુધી અષાઢ મહિનો રહેશે
હિંદુ પંચાંગનો ચોથો મહિનો અષાઢ છે. હિંદુ ધર્મ અનુસાર પૂજા પાઠ માટે આ મહિનાનું અનેરું મહત્ત્વ છે, જ્યારે વર્ષાઋતુનું આગમન થાય છે. વાતાવરણમાં ફેરફાર થવાને કારણે આ મહિનામાં આરોગ્યનું ખાસ ધ્યાન રાખવાનું રહે છે. 5 જૂનથી 4 જુલાઈ સુધી અષાઢ મહિનો રહેશે. આ મહિનામાં દેવશયની એકાદશી આવે છે. આ એકાદશી પછી ભગવાન વિષ્ણુ યોગ નિંદ્રામાં જતા રહે છે.
અષાઢ મહિનાનું ધાર્મિક મહત્ત્વ
- અષાઢ મહિનો ભગવાન વિષ્ણુનો માનવામાં આવે છે. આ દરમિયાન ભગવાન વિષ્ણુની પૂજા કરવાથી પુણ્ય પ્રાપ્ત થાય છે.
- અષાઢ મહિનાની યોગિની એકાદશીનું વ્રત કરવાથી 88 હજાર બ્રાહ્મણને ભોજન કરાવવાનું પુણ્ય પ્રાપ્ત થાય છે.
- આ મહિનાની શુક્લ પક્ષની એકાદશીને દેવશયની અગિયારસ કહેવામાં આવે છે. દિવસે ભગવાન વિષ્ણુ યોગ નિંદ્રામાં જતા રહે છે, જેથી 4 મહિના સુધી માંગલિક કાર્યો કરવામાં આવતા નથી.
- અષાઢ મહિનામાં જ ગુરુ પૂર્ણિમાનો પર્વ ઊજવવામાં આવે છે. આ દિવસે ગુરુજનોની પૂજા કરવામાં આવે છે.
- ભગવના વિષ્ણુની સાથે ભગવાન શિવની પૂજા પણ શુભ માનવામાં આવે છે. આ મહિનામાં આવનાર પ્રદોષ વ્રત અને માસિક શિવરાત્રિનું વિશેષ મહત્ત્વ હોય છે.
અષાઢ માસમાં શું કરવું?
આ મહિનાને વર્ષા ઋતુ પણ કહેવામા આવે છે, જેથી સંક્રમણનું જોખમ વધુ રહે છે. આ દરમિયાન પૌષ્ટિક અને સંતુલિત આહારનું જ સેવન કરવું જોઈએ.
ખાવા પીવાની બાબતોનું રાખો ધ્યાન
- આ મહિને રસદાર ફળોનું સેવન કરવું.
- તળેલી વસ્તુઓનું વધુ સેવન ના કરવું.
- વાસી ભોજન ના કરવું.
- બજારમાં જે પણ વસ્તુઓ લાવો તે સરખી ધોઈને જ વાપરવી.
દાનનું મહત્ત્વ
અષાઢ મહિનાની પૂર્ણિમાને ગુરુ પૂર્ણિમા તરીકે ઓળખવામાં આવે છે. આ દિવસે ગુરુજનોના આશીર્વાદ પ્રાપ્ત થાય છે. આ મહિનામાં તીર્થ યાત્રા કરવાને શુભ માનવામાં આવે છે. આ મહિને દાન અને ધ્યાનનું અનેરું મહત્ત્વ છે. મીઠું, તાંબુ, કાંસુ, માટીના વાસણ, ઘઉં, ચોખા તથા તલના દાનને શુભ માનવામાં આવે છે.
(DISCLAIMER: આ લેખમાં ધર્મને લગતી આ માહિતી માત્ર અલગ-અલગ મળતી માહિતીને આધારિત છે. નહીં કે, તમે તેને સત્ય જ માની લો. કારણ કે ધર્મ એ દરેકની આસ્થાનો વિષય છે. આથી અહીં આપવામાં આવેલી જાણકારીને અનુસરતા પહેલા ધર્મ કે શાસ્ત્ર આધારિત જ્ઞાન ધરાવનારા વિદ્ધાનોની સલાહ લેવી અતિ આવશ્યક રહેશે. કોઈપણ પ્રકારની મુશ્કેલી સર્જાશે તો તે માટે VTV ગુજરાતી જવાબદાર નહીં રહે. આ લેખ માત્ર ન્યૂઝના હેતુસર પબ્લિશ કરવામાં આવ્યો છે.)
