ચીમકી / વિપુલ ચૌધરીને છોડાવવા માટે આમરણ ઉપવાસ: મહેસાણામાં ચૌધરી સમાજના સંમેલનમાં કરાયું એલાન

• અર્બુદા ધામ ખાતે આંજણા ચૌધરી સમાજનું મહાસંમેલન યોજાયું
• મોટી સંખ્યામાં ચૌધરી સમાજના આગેવાનો રહ્યા ઉપસ્થિત
• મહંત જાખડ ઋષિએ વિપુલ ચૌધરીને છોડાવવા કરી ઉપવાસની જાહેરાત

મહેસાણામાં અર્બુદા ધામ ખાતે આંજણા ચૌધરી સમાજનું મહાસંમેલન યોજાયું હતું. જેમાં મોટી સંખ્યામાં આંજણા ચૌધરી સમાજના લોકો ગામેગામથી ટ્રેક્ટર, ગાડીઓ, લક્ઝરી બસો લઈને ઊમટી પડ્યા હતા. આ મહાસંમેલનમાં પુરુષોની સાથે-સાથે આંજણા ચૌધરી સમાજની મહિલાઓ પણ મોટી સંખ્યામાં જોડાઈ હતી. આ મહાસંમેલનનું આયોજનો અર્બુદા સેના દ્વારા કરવામાં આવ્યું હતું. આ સંમેલનને ધ્યાનમાં રાખીને સ્થળે ચુસ્ત બંદોબસ્ત ગોઠવવામાં આવ્યો હતો.

વિપુલ ચૌધરીની ધરપકડનો વિરોધ 

ઠેર-ઠેર અર્બુદા સેનાના અધ્યક્ષ વિપુલ ચૌધરીની ધરપકડનો વિરોધ કરવામાં આવી રહ્યો છે. હવે અર્બુદાધામના મુખ્ય મહંત જાખડ ઋષિ આવ્યા વિપુલ ચૌધરીના સમર્થનમાં આવ્યા છે.  આજે વિસનગરના બાસણા ગામે વિપુલ ચૌધરીની ધરપકડના વિરોધમાં મહાસંમેલનનું આયોજન કરવામાં આવ્યું હતું. આ મહાસંમેલનમાં મોટી સંખ્યામાં ચૌધરી સમાજના આગેવાનો ઉપસ્થિત રહ્યા હતા. જોકે, સંમેલનમાં વિપુલ ચૌધરીની ગેરહાજરીમાં તેમના સ્થાને પાઘડી મૂકવામાં આવી હતી.

વિપુલ ચૌધરીને છોડવવા કરી ઉપવાસની જાહેરાત

આ તકે મહંત જાખડ ઋષિએ વિપુલ ચૌધરીને સમર્થન આપી ઉપવાસની ચીમકી ઉચ્ચારી હતી. મહંતે જણાવ્યું હતું કે, જો પાંચ દિવસમાં વિપુલ ચૌધરીને છોડવામાં નહીં આવે તો ગાંધીનગરમાં આમરણ ઉપવાસ કરવામાં આવશે. 

ભગતસિંહ બનવા મજબૂર ન કરોઃઅર્બુદા સેનાના જિલ્લા મહામંત્રી

આ ઉપરાંત અર્બુદા સેનાના જિલ્લા મહામંત્રીએ જણાવ્યું હતું કે, વિપુલ ચૌધરી જે તરફ ઈશારો કરશે અમે તે તરફ અમે મતદાન કરીશું. અમારા સમાજના નેતાને જેલમાં પૂરી અમને ભગતસિંહ બનવા મજબૂર ન કરો તો સારી વાત છે. તેમણે આક્રોશ ઠાલવતા કહ્યું હતું કે, અમારી એક જ માંગ છે કે વિપુલ ચૌધરીને કોઈપણ ભોગે મુક્ત કરવામાં આવે.