કાર્યવાહી / અમદાવાદીઓ ધ્યાન રાખજો, આડેઘડ પાર્કિંગ કર્યું તો પાવતી ફાટશે, 6 ફોર વ્હીલર સહિત 14 વાહનને AMCએ તાળાં માર્યાં

• અમદાવાદમાં રોડ પર પાર્કિંગના મામલે કાર્યવાહી
•  છ ફોર વ્હીલર સહિત ૧૪ વાહનને AMCએ તાળાં માર્યાં
• પાર્કિંગમાં બેદરકાર વાહનચાલકોમાં ભારે ગભરાટ

જાહેર રોડ અને ફૂટપાથ પર ટ્રાફિકને અડચણરૂપ બને તે રીતે ફોર વ્હીલર સહિતનાં વાહનો પાર્ક કરનારા નાગરિકો સામે મ્યુનિ. સત્તાવાળાઓ દ્વારા સતત દંડાત્મક કાર્યવાહી થઈ રહી છે. આવાં વાહનને તંત્ર તાળાં મારીને જે તે વાહનચાલક પાસેથી આકરો વહીવટીચાર્જ વસૂલે છે. ગઈ કાલે છ ફોર વ્હીલર સહિત કુલ ૧૪ વાહન સામે આકરાં પગલાં લેવાતાં પાર્કિંગમાં બેદરકાર વાહનચાલકોમાં ભારે ગભરાટ ફેલાઈ ગયો હતો.

વાહનચાલકો સામે ઝુંબેશ
દક્ષિણ-પશ્ચિમ ઝોનના એસ્ટેટ વિભાગ દ્વારા ગઈ કાલે વેજલપુર વોર્ડ અને જોધપુર વોર્ડમાં આવેલા પ્રહ્લાદનગર ગાર્ડન ચાર રસ્તાથી હરણ સર્કલ થઈ આનંદનગર ચાર રસ્તા થઈ શ્યામલ ચાર રસ્તા સુધીના જાહેર રોડ અને ફૂટપાથ પર ટ્રાફિકને અવરોધરૂપ પાર્કિંગ કરનારા વાહનચાલકો સામે ઝુંબેશ હાથ ધરાઈ હતી, જે હેઠળ છ ફોર વ્હીલરને તાળાં મારીને તંત્રે રૂ. ૩૮૦૦નો દંડ વસૂલ્યો હતો. ઉપરાંત દક્ષિણ ઝોનમાં પણ એસ્ટેટ વિભાગે રોડ અને ફૂટપાથ પર ટ્રાફિકને નડતર બનેલાં આઠ વાહનોને લોક માર્યાં હતાં. ત્યાર બાદ જે તે વાહનચાલક પાસેથી રૂ. ચાર હજાર દંડ પેટે વસૂલ્યા હતા.

પ્રેમચંદનગર ચાર રસ્તા સુધીનાં દબાણ હટાવાયાં
જ્યારે ઉત્તર-પશ્ચિમ ઝોનમાં થલતેજ વોર્ડ, ચાંદલોડિયા વોર્ડ, બોડકદેવ વોર્ડ, ઘાટલોડિયા વોર્ડ, ગોતા વોર્ડમાં ઠેર ઠેર રોડ પરનાં દબાણ દૂર કરાયાં હતાં. તંત્રે નવ લારી, એક  ડેડ વિહિકલ, ૧૦૫ બોર્ડ-બેનર તેમજ ૧૪૮ પરચૂરણ માલસામાન જપ્ત કરીને કુલ રૂ. ૬૩,૫૦૦નો દંડ વસૂલ્યો હતો. બોડકદેવ વોર્ડમાં માનસી સર્કલથી પ્રેમચંદનગર ચાર રસ્તા સુધીનાં દબાણ હટાવાયાં હતાં.