- હવામાં ફ્લાઈટ ખરાબીની વધુ એક ઘટના
- દુબઈથી કોચી આવી રહેલી એર ઈન્ડીયાની ફ્લાઈટમાં લો પ્રેશર
- મુંબઈમાં કરાવવું પડ્યુ ઈમરજન્સી લેન્ડિંગ
દેશમાં હવે દરરોજ ફ્લાઈટમાં ખરાબી અને તેને કારણે ઈમરજન્સી લેન્ડિંગની ઘટનાઓ બનવા લાગી છે. આજે હવે એર ઈન્ડીયાનો વારો આવ્યો છે. દુબઈથી કોચી આવી રહેલી એર ઈન્ડીયાની Flight No. AI- 934માં હવામાં જ લો પ્રેશર સર્જાયું હતું. આને કારણે પ્રવાસીઓમાં ગભરાટ ફેલાયો હતો, પ્રવાસીઓને શ્વાસ લેવામાં તકલીફ પડી હતી. ઘટનાની ગંભીરતાને પારખીને પાયલટે ફ્લાઈટને કેરળ બાજુ ન વાળતા મહારાષ્ટ્ર બાજુ વાળી મૂકી હતી અને છેક મુંબઈમાં જઈને ઈમરજન્સી લેન્ડિંગ કરાવી દીધી હતી.
દિલ્હીથી ગુવાહાટી જતી ફ્લાઇટની વિન્ડશિલ્ડમાં હવામાં તિરાડ પડી
દિલ્હીથી ગુવાહાટી જતી ફ્લાઇટની વિન્ડશિલ્ડમાં હવામાં તિરાડ પડી ગઈ હતી. ત્યારબાદ વિમાનને જયપુર ડાયવર્ટ કરવામાં આવ્યું હતું. ડીજીસીએના એક અધિકારીએ આ જાણકારી આપી છે. અધિકારીઓના જણાવ્યા અનુસાર ગો ફર્સ્ટ ફ્લાઇટ જી8-151ની વિન્ડશિલ્ડ તૂટી ગઇ હતી.
ગો ફર્સ્ટની મુંબઈ-લેહ અને શ્રીનગર-દિલ્હી ફ્લાઈટમાં આવી હતી ખરાબી
મંગળવારે ગો ફર્સ્ટની મુંબઈ-લેહ અને શ્રીનગર-દિલ્હી ફ્લાઈટમાં એન્જિન ખરાબ થવાના કારણે બંને વિમાનોને ઉડાન ભરતા રોકવામાં આવ્યા હતા. અધિકારીઓએ જણાવ્યું હતું કે ડીજીસીએ આ બંને ઘટનાઓની તપાસ કરી રહ્યું છે. અધિકારીઓના જણાવ્યા અનુસાર, બે નંબરના એન્જિનમાં ખામી હોવાના અહેવાલ બાદ ગો ફર્સ્ટની મુંબઇ-લેહ ફ્લાઇટને રસ્તાની વચ્ચેથી દિલ્હી તરફ વાળવામાં આવી હતી. તેમણે કહ્યું કે, કંપનીની શ્રીનગર-દિલ્હી ફ્લાઇટના એન્જિન નંબર બેમાં પણ મિડ એર ફોલ્ટ હોવાનું જાણવા મળ્યું હતું, ત્યારબાદ તેને શ્રીનગર પરત ફરવાનો નિર્દેશ આપવામાં આવ્યો હતો.
