પ્રદર્શન / અમદાવાદનો ફ્લાવર શો લોકો માટે બન્યો આકર્ષણનું કેન્દ્ર, માત્ર 8 દિવસમાં આટલાં લાખ લોકોએ મુલાકાત લીધી

• અમદાવાદમાં ફ્લાવર શોમાં લોકોનો જમાવડો
• 8 દિવસમાં 5.5 લાખથી વધુ લોકોએ મુલાકાત લીધી
• અત્યાર સુધી 2.80 લાખ ટિકિટનું વેચાણ થયું
• સ્કૂલના 1.50 લાખ વિદ્યાર્થીઓએ ફ્લાવર શોની લીધી મુલાકાત
• અટલ બ્રિજ ની 1.80 લાખ ટિકિટનું વેચાણ થયું

અમદાવાદમાં ફ્લાવર શોમાં લોકોનો જમાવડો જોવા મળી રહ્યો છે. વિગતો મુજબ છેલ્લા 8 દિવસમાં 5.5 લાખથી વધુ લોકોએ મુલાકાત લીધી છે. અત્યાર સુધી 2.80 લાખ ટિકિટનું વેચાણ થયું છે. મહત્વનું છે કે, સ્કૂલના 1.50 લાખ વિદ્યાર્થીઓએ ફ્લાવર શોની મુલાકાત લીધી હતી. આ તરફ અટલ બ્રિજની પણ 1.80 લાખ ટિકિટનું વેચાણ થયું હતું. 

અમદાવાદ રિવરફ્રન્ટ પાસે દર વર્ષે યોજાતા ફ્લાવર શોમાં મોટી સંખ્યામાં લોકો ઉમટી રહ્યા છે. મહત્વનું છે કે, દર વર્ષે ડિસેમ્બરના અંતિમ સપ્તાહમાં અમદાવાદ રિવરફ્રન્ટ પર ફ્લાવર શો યોજાતો હોય છે. દર વર્ષે જાન્યુઆરી મહિનામાં ફ્લાવર શો યોજવામાં આવે છે. જેમાં લાખો લોકો રિવરફ્રંટ પર  ફ્લાવર શો જોવા ઉમટતા હોય છે.  

31 ડિસેમ્બરથી 15 જાન્યુઆરી સુધી યોજાશે ફ્લાવર શો
31 ડિસેમ્બરથી ફ્લાવર શો રિવરફ્રન્ટનાં ઈવેન્ટ સેન્ટર ખાતે શરૂ થયો છે. AMC દ્વારા 2.5 કરોડના ખર્ચે ફ્લાવર શોનું આયોજન કરવામાં આવ્યું છે. ત્યારે ફ્લાવર શો માં વિવિધ સ્કલ્પચર પણ ઉભા કરવામાં આવ્યા છે. તેમજ G 20 , સ્પોર્ટ્સ, ઋષિમુનિ, હનુમાનજીના સ્કલ્પચર મૂકવામાં આવ્યા છે. બે વર્ષ બાદ ફ્લાવર શો યોજાઈ રહ્યો છે. ત્યારે 31 ડિસેમ્બરથી 15 જાન્યુઆરી સુધી ફ્લાવર શો નું આયોજન કરવામાં આવ્યું છે.