- ઇસનપુરમાં નાણાંની લેતીદેતીમાં હત્યા
- માત્ર 50 રૂપિયા માટે જીવ ગુમાવ્યો
- નાણાંની ઉઘરાણી કરતા યુવકની હત્યા
રાજ્યમાં અવાર-નવાર હત્યાના બનાવો સામે આવતા હોય છે ત્યારે અમદાવાદના ઇસનપુરમાંથી વધુ એક ચોંકાવનારી ઘટના સામે આવી છે. માત્ર 50 રૂપિયા માટે એક 30 વર્ષિય નિલેષ બાથમ નામના યુવકને છરીના ઘા ઝીંકી રહેંસી નાખવામાં આવ્યો છે.
CCTVમાં મૃતકની બહેને આરોપીને ઓળખો કાઢ્યા
પોલીસ કસ્ટડીમાં જોવા મળતા આરોપી શુભમ રાજપૂત અને શિવમ બાથમ છે. રૂ 50 માટે એક યુવકની હત્યા કરી દીધી. ઘટના એવી છે કે ઇસનપુર વિસ્તારમાં 30 વર્ષિય નિલેષ બાથમ પરિવાર સાથે રહેતો હતો અને ઓટો રીક્ષા ચલાવી પરિવારનું ગુજરાન ચલાવતો હતો. નિલેષને અજાણ્યા શખ્સોએ ઝઘડો કરી છરી મારીને ફરાર થઈ ગયા હતા. ઇજાગ્રસ્ત નિલેશને સારવાર માટે હોસ્પિટલમાં ખસેડવામાં આવ્યો. જ્યાં સારવાર દરમ્યાન નિલેશ ભાઈનું મૃત્યુ થયું. પોલીસે હત્યાનો ગુનો નોંધી CCTV ચેક કરતા બાઈક પર આવેલા આરોપીને મૃતકની બહેન ઓળખી જતા હત્યાનો ભેદ પોલીસે ઉકેલી કાઢીને સગીર સહિત 3 ની ધરપકડ કરી છે.
50 રૂપિયાની ઉઘરાણી વારંવાર કરતાં હત્યાનો ખેલ ખેલાયો
પકડાયેલા આરોપી શુભમ અને શિવમ શાકભાજીની લારીમાં ધધો કરે છે. મૃતક નિલેશ આરોપી પાસે રૂ 50 લેવા ગયો હતો. પરંતુ આરોપી પૈસા આપતો નહતો. જેથી નિલેશ રોજ ઉઘરાણી કરવા જતો હતો. જેની અદાવત રાખીને આરોપીએ હત્યા કરવાનું ષડયંત્ર રચ્યું. અને પોતાના ભાઈ સાથે મળીને નિલેશ પર છરીના ઘા ઝીકી દીધા. પરંતુ આરોપી અને મૃતક કુટુંબમાં સંબંધી થતા હોવાથી મૃતકની બહેન તેઓને ઓળખી ગઈ હતી.
આરોપીઓ સામાન લઈને ઉત્તરપ્રદેશ ફરાર થઇ જવાના પ્રયાસમાં જ હતા પરંતુ પોલીસે તેઓને ઝડપી લીધા. રૂ 50 માટે એક યુવકની હત્યા કેસમાં પોલીસે આરોપીઓની ધરપકડ કરીને હત્યા માટે ઉપયોગમાં લીધેલું હથિયાર જપ્ત કરવાની કાર્યવાહી કરી છે. આ હત્યા ફક્ત 50 રૂપિયા માટે જ થઈ કે અન્ય કોઈ કારણ છે તે મુદ્દે વધુ તપાસ શરૂ કરવામાં આવી છે.
