આશા નિરાશામાં ફેરવાઇ / ટામેટાં બાદ હવે કેળાના ભાવ આસમાને, 20 કિલોના 400 રૂપિયા, છતાંય ખેડૂતોને નુકસાન, જાણો કેમ

• છોટાઉદેપુરના બોડેલી તાલુકાના ખેડૂતો પરેશાન
• કેળાના ભાવ વધ્યા પણ ખેડૂતોને નુકસાન
• 20 કિલોના ભાવ 400ને પાર પહોચ્યાં
• વાવાઝોડાથી કેળાની બાગને ભારે નુકસાન
• બોડેલીને રાહત પેકેજ નથી અપાયું

છોટાઉદેપુર જિલ્લાના બોડેલી તાલુકામાં બાગાયતી પાકમાં કેળાંનુ વાવેતર મોટા પ્રમાણમાં કરવામાં આવે છે ત્યારે બોડેલીના ચલામલી વિસ્તારમાં હાલમાં કેળાના ભાવમાં ઉછાળો આવતાં ભાવ આસમાને પહોંચ્યો પણ કેળામાં નુકશાન હોવાથી ખેડૂત દુઃખી છે. રાજ્યમાં કેળાના ભાવ ખૂબ મોટા પાયે ભાવ વધ્યા છે પરંતુ ખેડૂતોને તો નુકશાન થઈ રહ્યું છે. 20 કિલો કેળાના ભાવ રૂ.400 વધારે થઈ ગયા છે. પરંતુ ખેડૂતો માટે આફત યથાવત છે. બીપોરજોય વવાઝોડાના કારણે થયેલા નુકશાનને પહોંચી વળવા માટે કોઈ ઉપાય ન હોઇ હવે ખેડૂતો સર્વે કરીને વળતર મળે તેવી માંગ કરી રહ્યા છે. 
 
છોટાઉદેપુર જિલ્લાના બોડેલી તાલુકાના ખેડુતોને ભારે મુશકેલીનો સામનો કરવો પડી રહ્યો છે. વાત જાણે એમ છે કે, ખેડૂતો માટે રોકડિયા પાક તરીકે કેળની ખેતી માટે આગવી ઓળખ ધરાવતા છોટાઉદેપુર જિલ્લાના બોડેલી તાલુકાના અનેક વિસ્તારના કેળાંની માંગ ઉત્તર ભારતના જુદા જુદા રાજ્યમાં સપ્લાય થાય છે. હાલમાં કેળાના ભાવમાં ઉછાળો આવ્યો છ. જોકે ખેડૂતો ગેલમાં આવે તે પહેલાં તેઓને દુઃખ સહન કરવું પડ્યું છે.

કેળાંના ભાવ તો વધ્યા પણ..... 
નોંધનીય છે કે, કેળાના ભાવ રૂ.230 થી વધીને રૂ.425 થતાં ખેડૂતોને સારા ભાવની આશા જાગી હતી, પરંતુ ખેતીમાં થયેલા નુકશાનના કારણે ખેડૂતો ખર્ચ પણ સરભર કરી શકે તેમ નથી. બોડેલી તાલુકામાં કેળાંની ખેતી વિપુલ પ્રમાણમાં થાય છે, આ વિસ્તારના કેળાં બજારમાં સારી શાખ બન્યા છે. ગત્ વર્ષે શ્રાવણની શરૂઆત પહેલાં કેળાના ભાવ રૂ.450 સુધી પહોંચ્યા હતા. 

તાજેતરમાં જિલ્લામાં ચોથી જુનના રોજ વાવાઝોડા સાથે વરસેલા કમોસમી વરસાદથી બાગાયત પાક પકવતા ખેડૂતોને ખૂબ મોટા પાયે નુકસાની વેઠવાનો વારો આવ્યો હતો. જેમાં ઉભા તૈયાર થયેલા મહામુલા કેળના પાક સામે પ્રચંડ પવન સાથે ફુંકાયે લા વાવાઝોડાથી જમીનદોસ્ત થતા ખેડૂતો પરેશાન છે. કમોસમી વરસાદને કારણે અસરગ્રસ્ત ખેડૂતોને માટે સરકાર દ્વારા કોઈ રાહત પેકેજ આ વિસ્તાર માટે થયું નથી. 

સરકાર સહાય કરે તેવી માંગ 
આ તરફ પંથકમાં વાવાઝોડા બાદ કેળાંના પાકને મોટું નુકશાન પહોંચ્યું છે. જોકે સરકાર દ્વારા કોઈ સહાય જાહેર ના થતાં ખેડુત આલમમાં રોષની લાગણી ફેલાઈ છે. કેળાના બજાર ભાવ વધવા ધટવા પાછળ કુદરતી અને કૃત્રિમ અનેક પરિબળો કારણભૂત છે.  મોંધાભાવના ટીસ્યુના રોપા, ખાતર સહિત અન્ય મજુરી ખર્ચો મોંધા થતાં ખેડૂતોને આર્થિક નુક્સાન સહન કરવાનો વારો આવ્યો છે.