- આજથી પુરુષો પણ ચાચર ચોકમાં રમી શકશે ગરબા
- વહીવટી તંત્રએ નિર્ણય કરતા શ્રદ્ધાળુઓમાં ખુશીનો માહોલ
- ચાચર ચોકમાં માત્ર મહિલાઓ ગરબા રમી શકે તેવો કરાયો હતો નિર્ણય
- VTV NEWSના અહેવાલ બાદ વહીવટી તંત્રએ કર્યો નિર્ણય
આધ્યાશક્તિની ઉપાસનાના પર્વ નવરાત્રીમાં અંબાજી મંદિરના ચાચરચોકમાં ઉજવાતો મહોત્સવ દેશ દુનિયામાં ખ્યાતનામ છે. આ ગરબી મહોત્સવમાં અગાઉ એવો નિર્ણય લેવામાં આવ્યો હતો કે હવે મહિલાઓ અને પુરુષોને અલગ અલગ ગરબા ગાવાના રહેશે. એટલે કે ચાચર ચોકમાં ગરબા ગાવા માટે પુરુષોને એન્ટ્રી નહીં મળે તેવો વહીવટી તંત્ર દ્વારા નિર્ણય કરવામાં આવ્યો હતો. જો કે આ મામલે ખેલૈયાઓમાં વિરોધનો સુર ઉઠ્યો હતો. VTV NEWSએ આ અહેવાલ પ્રસિદ્ધ કરી ખેલૈયાઓની લાગણી તંત્ર સુધી પહોંચાડી હતી. ત્યારે VTV NEWS નો આ ધારદાર અહેવાલ વધુ એક વખત અસરદાર સાબિત થયો છે.
આજથી ચાચર ચોકમાં મહિલા અને પુુરુષ બન્ને રમી શકશે ગરબા
પરિણામે વહીવટી તંત્ર દ્વારા આ નિર્ણયમાં બદલાવ કરવામાં આવ્યો છે અને હવે પુરુષોને પણ ચાચરચોકમાં ગરબા રમવાની મંજૂરી અપાઈ છે. વહિવટી તંત્રએ ખેલૈયાઓની લાગણીને માન. આપી નિર્ણય બદલતા ખેલૈયાઓમાં ખુશીનો કોઈ પાર નથી. ગરબા રસિકોએ વહિવટી તંત્રનો આભાર પણ માન્યો હતો. આમ હવે ચાચર ચોકમાં પુરુષો ગરબા રમશે. પરંતુ મહિલાઓથી અલગ આયોજન કરાશે. ચાચરચોકમાં આજથી મહીલા અને પુરુષો અલગ અલગ વ્યવસ્થા પ્રમાણે ગરબા રમશે.
અગાઉ કરાયો હતો આ નિર્ણય
અગાઉ મહિલાઓની ગરિમા જળવાય તે માટે પુરુષ અને સ્ત્રીઓ એક સાથે ગરબા નહીં રમી શકે તેવું જિલ્લા કલેકટરે મીડિયા સમક્ષ નિવેદન આપ્યું હતું. પુરુષોએ પિત્તળચોક બહાર અલગ વ્યવસ્થા કરવામાં આવે તેવું જણાવ્યું હતું અને ત્યાં જ ગરબા રમવા અને ગાવા માટે કહેવામાં આવ્યું હતું અને ગરબામાં પ્રવેશ કરવા માટે લોકોએ પોલીસને પોતાની ઓળખ દર્શાવવી પડશે. તેવો નિર્ણય કરાયો હતો. જે હવે બદલાયો છે આથી લોકોમાં ખુશી જોવા મળી રહી છે.
