એક્શન / રાજકોટ બાદ વડોદરામાં લોકોના સ્વાસ્થ્ય સાથે ચેડા, પનીરના સેમ્પલ સબ સ્ટાન્ડર્ડ આવ્યા બાદ ત્રણના લાયસન્સ સસ્પેન્ડ

• વડોદરામાંથી પનીર ખરીદતા લોકો ચેતજો
• 3 વિક્રેતાના પનીરના નમૂના સબ સ્ટાન્ડર્ડ આવ્યા
• ત્રણેયના લાયસન્સ સસ્પેન્ડ કરવામાં આવ્યા

રાજકોટ બાદ હવે વડોદરામાં પણ પનીરના સેમ્પલ ફેલ થયા છે. વડોદરા પાલિકાના ફૂડ વિભાગ દ્વારા હાથ ધરવામાં આવેલી તપાસમાં પનીરના નમૂના ફેલ થયા છે. પાલિકા દ્વારા ત્રણ પનીરના મેન્યુફેક્ચરિંગ યુનિટના લાયસન્સ સસ્પેન્ડ કરવામાં આવ્યા છે.

3 વિક્રેતાના પનીરના નમૂના સબ સ્ટાન્ડર્ડ આવ્યા
મળતી માહિતી અનુસાર, વડોદરા મ્યુનિસિપલ કોર્પોરેશન દ્વારા શહેરના વિવિધ વિસ્તારોમાં ચેકિંગ હાથ ધરવામાં આવ્યું હતું. આ દરમિયાન ટીમ દ્વારા વિવિધ જગ્યાએ ખાદ્ય વસ્તુઓના સેમ્પલ લઈને ટેસ્ટિંગ માટે લેબોરેટરીમાં મોકલ્યા હતા. આ દરમિયાન ડભોઈ રોડ પર આવેલ શ્રી સાંઈનાથ મિલ્ક સપ્લાયર, વડસર બ્રિજ નજીક આવેલ અમૃતમ ફૂડ પ્રોડક્ટ્સ અને  વાઘોડિયા રોડની શ્રી દ્વારકેશ ડેરીના નમૂના સબ સ્ટાન્ડર્ડ જણાયા હતા. આ 3 વિક્રેતાના પનીરના નમૂના સબ સ્ટાન્ડર્ડ આવ્યા હતા. 

ત્રણેયના લાયસન્સ સસ્પેન્ડ કરવામાં આવ્યા
પાલિકાએ શ્રી સાંઈનાથ મિલ્ક સપ્લાયર, અમૃતમ ફૂડ પ્રોડક્ટ્સ અને દ્વારકેશ ડેરીના નમૂના સબ સ્ટાન્ડર્ડ જાહેર થતાં લાયસન્સ સસ્પેન્ડ કર્યાં છે. બીજી તરફ ફૂડ ઇન્સ્પેક્ટરની ટીમે 15 ફુડ બિઝનેસ ઓપરેટરોને સ્વચ્છતા માટે નોટિસ ફટકારી હતી.

રાજકોટમાં પણ ફૂડ વિભાગે બોલાવ્યો હતો સપાટો
આપને જણાવી દઈએ કે, આ પહેલા રાજકોટમાંથી 1 હજાર 600 કિલો શંકાસ્પદ પનીરનો જથ્થો ઝડપાયો હતો, 1 હજાર 600 કિલો પનીર મળ્યા બાદ RMC એકશનમાં આવી હતી અને શહેરની 17 હોટલ અને રેસ્ટોરન્ટમાં ચેકિંગ હાથ ધર્યું હતું. 16 કિલો અખાદ્ય પદાર્થનો સ્થળ પર જ નાશ કરાયો હતો. 2 વેપારીને સ્ટોરેજ અને સ્વચ્છતા જાળવવા નોટિસ ફટકારી હતી.